Giklaro ni Ombudsman Director Virginia Palanca-Santiago nga bisan pa og saging dili tugtan ang ilang mga kawani sa pagdawat og mga gasa sa bisan unsang klase nga okasyon.
Si Santiago nagkanayon nga base sa lagda sa balaod ug sa ombudsman dili gyud sila mamahimong modawat og mga gasa gikan sa usa ka opisyal ug sa pribadong tawo aron malikayan ang mga isyu.
Gitataw ni Santiago nga bisan pa kun aduna silay madawat nga mga gasa nga molampas sa P200 gikan sa ilang mga paryente gikinahanglan kining ilang itala sa ingon masiguro nga dili sila madaot niini kun ugaling imbestigahan.
Gipadayag ni Santiago ang pagpreserba sa integridad sa ilang ahensiya ug mga buhatan.
Subay niini, ang Ombudsman director nagkanayon nga kun aduna man gani mga butang, prutas ug pagkaon nga ihatod diha sa ilang butahan ila gyud kining ipanghatag diha sa drop-in center ug sa ubang institusyon o sa aselo aron mapuslan kini sa mga kabus.
Base sa taho nga sa panahon nga magsingabot ang pasko daghang mga pribadong tawo ug opisyal ang manghatag og mga gasa sa nagkadaiyang ahensiya sa gobiyerno.
Samtang karong bag-o lang ang Malacañang na isyu usab nga nanghatag og suborno sa mga kongresista ug mga gobernador sa nasud.