Igsoon sa polis nagdala’g pusil sikop

Gwardiya sa  city hall sa Mandaue ug igsoon sa kontrobersiyal nga polis kinsa nagdala og armas diha sa usa ka tindahan sa dalan MC Briones, Barangay Bakilid Mandaue ang nasikop sa milabay’ng  gabii.

Ang suspetsado mao si Roy Monteroyo, 37-anyos nagpuyo sa  Barangay Centro sa maong dakbayan, igsoon ni PO3 Paquito “Ricky” Monteroyo.

Si PO3 Dindo Montesclaros desk officer sa station 2 sa kapolisan sa Mandaue nagkanayon nga samtang nagkaon sa usa ka kan-anan si Monteroyo pipila ka mga tawo sa maong dapit ang nakakita nga misiwil ang armas niini hinungdan nga mitaho ang maong mga tawo ngadto ni PO1 Dante Flores traffic police sa siyudad.

Si PO1 Flores dali nga miresponde sa maong alarma ug nasakmitan gyud si Monteroyo og usa ka frontier pistol nga dunay tulo ka buhing bala sa M16 armalite.

Atol sa gipahigayong imbestigasyon sa kapolisan sa station 2 wala makapresentar og mga dokumento si Monteroyo pagmatuod sa legalidad sa iyang paghupot og armas hinungdan nga  gibalhog kini sa detention cell.

Matud pa ni PO3 Montesclaros nga posibleng pasakaan og kasong kalapasan sa RA 9284 kun Illegal nga paghupot sa armas nga walay lisensiya ug kalapasan sa Comelec gun ban si Monteroyo.