Habal driver kunsabo sa tulis

Usa ka 19-anyos nga lalaki gitulis sa duha ka wala mailhing tawo nga giingong kakunsabo sa drayber sa gisakyan niyang habalbahal didto sa Sitio Looc, Calero, Liloan.

Si Jack Suarin, taga Taboso, Negros Occidental, stay-in worker sa usa ka water refilling station sa Yati, Liloan midangop sa kapolisan ug mi-report nga gitulis siya samtang nagsakay sa habalhabal nga gimaneho ni Rolando Pepito, taga Upper Looc, Tayud, Liloan.

Nagpahatod siya sa Yati sa dihang duha ka tawo nga pamilyar niya og hitsura ang miduol sa iyang gisakyan dayong tion sa wala matinong kalibre sa armas dayong deklarar og tulis.

Nadala sa mga tulisan ang iyang cellphone nga nagkantidad og P5 mil ug kuwarta nga P1,050.

Gidala si Suarin sa kasagbutan kilid sa karsada ug gimanduang payak-on sa yuta. Nanglayas ang mga tulisan sakay sa motorsiklo nga gimaneho ni Pepito ug sa laing motorsiklo nga naabot didto.