Nangalyas diay

Nadugangan ang kaso sa usa ka gwardiyang nadakpan sa mga sakop sa Night Watch Patrol tungod sa paghupot og armas diha sa dalan Colon dihang nabistong nangalyas lang kini ug gigamit ang pangalan sa iyang suod nga higala.

Ang tinuuray nga Marjune Quiñanola, 22, mitumaw diha sa Criminal Investigation and Intelligence Branch kagahapon sa buntag human niya masutang gigamit sa iyang higala ang iyang pangalan.

Kini mitug-an nga ang pangalan sa maong gwardiya mao si Muin Salicala, 21, taga Bulacao ning dakbayan, suod nga higala ni Quiñanola.

Si Quiñanola, usa ka fourth year nga tinun-an sa kursong mechanical engineering sa usa ka unibersidad dinhi sa dakbayan. Sa pakighinabi sa Banat News kini mitug-an nga nahibulong nalang siya dihang gikasab-an siya sa iyang inahan tungod kay nadakpan siya sa mga polis niadtong Sabado.

Apan gipanghimakak niya kini ug giadto ang Carbon police station ug gipangita si Salicala, ang polis diha sa maong estasyunan mitug-an kaniyang walay susama’g pangalan nga natanggong kanila kundili usa  ka Marjune Quiñanola.

Diha-diha gipresentar ni Quiñanola ang iyang school ID pagmatuod nga gigamit lang ni Salicala ang iyang pangalan.

‘Nahibulong nalang ko kay giingnan ko sa akong mga kaila nga naa daw ko sa newspaper, ang akong mama nasuko nako mao ‘tong niadto  ko sa Carbon,” asoy pang Quiñanola.

Si Quiñanola nagkanayon nga nagkaila sila tungod sa iyang uyab nga silingan ni Salicala hangtud nga sila nagkasuod samtang siya gwardiya pa usab niadtong 2005.

Si Salicala kinsa gusto usab nga mag-gwardiya mihangyong hulmon una niini ang uniporme ni Quiñanola sanglit nag-eskuyla man kini ug siya wala pay uniporme.

Apan matud pang Quiñanola nahibaw-an nalang niya nga bisan ang iyang pangalan gigamit gihapon ni Salicala sa security agency nga iyang gisudlan sulod sa duha na ka bulan.

Si Sr. Insp. George Ylanan nagkanayon nga gawas sa paglapas sa Comelec Gun Ban ug paglapas sa RA 8294 kung Illegal possession of firearms and ammunitions, madugangan ang kaso ni Salicala og kasong paglapas sa Artikulo 178 sa Revised Penal Code kon  using fictitious names and concealing true names.

Si Salicala sa iyang bahin nagkanayon nga tungod sa karatol niya dihang naaktuhan siyang naghupot og kalibre .38 rebolber nila ni PO1 Armand Pacaña, PO1 Jodan Batucan nalitok niya nga siya si Quiñanola.

Si PO1 Pacaña mitug-an nga nagpatrolya sila sa Colon dihang ilang nasigpatan si Salicala nga nagkupot og pusil hinungdan nga ila kining gisita apan kini midagan ug misuway pa og pasa sa iyang armas sa laing tawo, apan ang naulahi miatras hangtud nga ila siyang naabtan ug gidakop.