Walay sobre –– Benhur

Hugtanong gihimakak ni Kongresista Benhur Salimbangon sa kwarto distrito sa lalawigan sa Sugbu ang nabaniog nga report may labot sa pagpanghatag og kwarta ni Presidente Gloria Arroyo ngadto sa mga kongresista  ug gobernador nga nitambong sa gipatawag nga meeting niini  sa niaging semana.

Gibutyag ni Salimbangon nga usa siya sa dul-an 200 ka mga kongresista nga nitambong sa  maong tigum ug wala gyud siya makamatikod nga dunay   nitunol og sobreng  dunay sulod nga salapi niadtong tungura.

Giangkon hinuon ni Salimbangon nga duna siyay gidala nga brown envelop niadtong tungura nga iyang gisudlan sa iyang request ngadto sa Presidente alang sa paghatag og gahin pagpatukod og balik sa nasunog nga tunghaan sa elementarya sa  Isla sa Bantayan pipila ka bulan na ang nilabay.

Matod ni Salimbangon wala hinoon siya masayod may labot sa giluwatang pamahayag ni Pampanga  Governor Ed Panlilio nga nikunpirmar sa tunga sa milyon ka pesos  ang  iyang nadawat.

Gani si Panlilio sa gipatawag niining press conference kagahapon sa buntag ni-presentar sa mga sakop sa media sa maong kantidad  ug andam niya kining iuli og balik kun dili mohatag og resibo ang Malacañang.