Natl ID gisupak ni Mike

Dili pabor si Cebu City Acting Mayor Michael Rama sa gibanhaw na usab nga National Identification kun National I.D. system.

Ang acting mayor mitataw nga sa pagkakaron dili pa andam ang nasud alang sa pagpatuman  sa nahisgutang sistema.

“I am not really in favor if they are not prepared, kana bang preserve the privacy, sa pagkakaron I doubt if ready na ta,” sumala pa  ni Rama.

“Nganong gibanhaw man na nga nahuman na man nang maong hisgutanan, gisalikway naman na niadto,” dugang pamahayag sa acting mayor.

Ang national I.D. system gibanhaw ni Senador Rodolfo Biazon alang sa seguridad ingon man sa pagsulbad sa bureaucratic red tape sa gobyerno.

Ang Senate Bill 1610 ni Biazon magmando sa tanang mga Pilipino nagpuyo man sa nasud o wala, nga magbaton og National I.D.

Kini nagpasabot nga compulsory ang pagpanag-iya ug paghupot niini kun maaprubahan ang nahisgutang balaodnon ni Biazon.

Sa iyang bahin, dunay panagana si Konsehal Edgardo Labella sa maong balaudnon ni Biazon ilabi na sa legalidad niini.

Ang konsehal nga maoy chairman sa committee on laws sa city council niingon nga way problema ang maong lakang kung kini dili pinugsanay.