Serial killer sa danao manaka’g balay

Usa ka serial killer nga gikatahong manaka sa kabalayan aron manglugos ug mopatay sa tagbalay gikahadlokan karon sa mga lumolupyo gikan sa lungsod sa Liloan ngadto na sa siyudad sa Danao.

Tungod niini, ang kapolisan sa Danao mihimong “top priority” sa pagpangita karon sa notadong most wanted nga tawo sa Danao nga nailhan sa ngalang si Warlito Toledo alyas Waway, lumad nga taga Sitio Banaba, Guinsay, siyudad sa Danao.

Si Supt. Larson Dechino, hepe sa kapolisan sa Danao, nagkanayon nga gipakatap sa iyang buhatan ang hulagway ni Waway sa mga pampublikong lugar gikan sa Liloan, Compostela ug Danao.

Giangkon ni Supt. Dechino nga nahadlok ang mga residente sa Danao sa ngalan ni Waway. Kini ang hinungdan nga bisan sayo pang gabii, manirado na sa kabalayan ang mga residente sa kahadlok nga sudlon ni Waway.

Base sa impormasyon nga miabot sa Banat News, si Waway manuktok sa kabalayan ug kadtong mangabli mahiagum sa linuog nga pagkamatay ang tibuok pamilya.

Matud pa nga gawas sa pagpatay, lugoson pa sa suspek ang mga babaye.

Sa pakighinabi sa Banat News ngadto sa pipila ka residente, nasayran nga si Waway nanimalos lamang sa nahidangatan sa iyang asawa ug mga anak nga babaye nga gipamatay human gilugos, apan hangtod karon walay suspetsado nga nasikop ug nataral sa hukmanan.

Si Supt. Dechino mihimakak sa maong taho tungod kay walay report nga naabot sa iyang buhatan kalabot sa kasong pagpatay ug paglugos sa asawa ug mga anak ni Waway.

Si SPO4 Florencio Balila, hepe sa Investigation Section sa Compostela Police Station, miasoy sa Banat News nga adunay mga insidente sa ilang lugar nga naglambigit ni Waway sa mga nahitabong patay.

Gihimakak usab ni Supt. Dechino ug SPO4 Balila nga mipatuman sila og news blockout kalabot ni Waway.

Base sa rekord nga na-ukayan sa Banat News, si Waway nahimong wanted sa Danao human malutsi og warrant of arrest nga giisyu ni RTC Judge Sylvia Paderanda niadtong  Marso 2003 tungod sa kasong pagpanglugos sa usa ka bata.

Tungod sa maong kaso, may reward nga P10 mil ang gitanyag sa kagamhanan ni bisan kinsa nga makatug-an sa nahimutangan ni Waway.

Gawas sa kasong pagpanglugos, si Waway giingong may kasong frustrated murder ug snatching. Ang katapusang kaso na-areglo pinaagi sa tabang sa iyang mga ginikanan.

Mapasalamaton hinuon si Supt. Dechino tungod sa pagkapagya sa ngalan ni Waway, sayo na kaayong manghipos ug manirado ang kabalayan, nga nakapadungag sa kahusay sa maong mga lugar nga nahadlok kaniya.