Husay sa RTCs suspendido kay way mga huwes

Suspendido ang gitakdang mga husay sa mga kaso nga anaa sa mga sala sa Regional Trial Court sa siyudad sa Sugbu sugod karong  Miyerkules.

Kini tungod kay ang kapin sa 20 ka mga RTC judges sa dakbayan molarga paingon sa kauluhan alang sa usa ka kalihukan.

Ang mga huwes motambong sa gitakdang tulo ka adlaw nga annual convention sa Philippine Judges Association of the Philippines sugod sa Oktubre 17.

Subay niini, ang mga huwes pinaagi ni Judge Sylva Paderanga mihangyo sa kagamhanan sa dakbayan nga maoy moabaga sa ilang registration expenses.

Wala  hinuon magmakuli ang siyudad paghatag og suporta ngadto sa nahisgutang mga huwes ug gihatag ang ilang gipangayo.

Ang City Council migahin gilayon  og kantidad nga kuhaon gikan sa Pagcor fund sa dakbayan nga alang sa nahisgutang galastuhan.

“Supportive man gyod ang siyudad sa mga huwes,” matud ni Konsehal Hilario Davide III nga maoy mipalabang sa resolusyon sa konsiho.

Sa pikas bahin nasayran sa Banat News nga ang City Government maghatagan og binuwan nga allowance ngadto sa nahisgutang mga huwes.

Gawas niini pipila ka kagamitan usab sa mga huwes diha sa ilang mga sala, ang gidonar sa kagamhanan sa dakbayan.

Kini giingong wa hinooy epekto sa mga kaso nga gipasaka batok sa City Government diha sa nagkadaiyang mga sala sa RTC.

Gani ang siyudad nangapildi sa pipila ka kaso nga giatubang niini, sama sa garnishment cases ug uban pa.

Pilde usab ang dakbayan sa gisang-at nga kaso sa usa ka abogado nga nagpaabli sa gisirad-an kaniadto nga South Coastal Road.