Clean Air Act sa nasud ipa-amend

Gisugyot karon sa konseho sa dakbayan sa Sugbu ngadto sa Kongreso nga amendahon ang Clean Air Act sa nasud.

Kini pinaagi usab sa resolusyon nga gipalabang ni Konsehal Nestor Archival atol sa miaging sesyon sa City Council.

Ang konsehal nga maoy chairman sa Committee on Ecology and Environmental Management sa konseho miingon nga dunay buslot ang maong balaod.

Kini tungod kay giingong wala maapil pag-regulate sa Clean Air Act ang mga eroplano nga maoy numero unong kusog mobuga og aso.

“Daghan na kaayo ta og balaod nga mag-regulate, mag-control sa smoke emission apan wala man maapil ang sa eroplano,” matud ni Archival.

“Angayan gyod nga i-apil pag-regulate ang aso nga gibuga sa mga eroplano tungod kay nakahatag usab ni sa global warming,”dugang pasabot sa konsehal.

Tungod niini giawhag sa City Council ang duha ka kongresista sa siyudad nga maoy moduso og balaodnon alang sa maong katuyuan.

Buot sa konseho nga sila si Kongresista Raul del Mar ug Antonio Cuenco maoy mo-introduce sa amendment sa nahisgutang balaod didto sa Kongreso.

Nagtuo si Archival nga nataligam-an lang sa mga magbabalaod ang pag-apil og regulate sa mga eroplano nga nakatampo usab sa green house gas.

Ang green house gas mao ang gibuga sa mga sakyanan sama sa aso nga giingong dako og mahatag nga kadaot sa kalibutan pinaagi sa global warming.