Pamilya sa bata namatay sa dengue gihaylo mosibog

Dunay tawo nga boluntaryong niduol ngadto sa ginikanan sa walo ka bulan nga bata nga si Mathew Maribao nga namatay sa dengue ug mitanyag nga maoy magpatunga aron isibog ang pagpasaka og kaso batok sa doktor nga gipasanginlang nagpabaya sa propesyon nga maoy gipasanginlan nga hinungdan sa pagkamatay sa bata.

 Ang apohan sa biktima nga si Leticia Maribao subling mibisita sa Bantay Radyo kagahapon sa buntag ug gitug-an niini nga dunay tawo ang nakigkita kaniya ug boluntaryo nga mitanyag nga maoy mangita og paagi aron mahilot ang maong problema.

Wala motug-an si Letecia kun si kinsa ang pangalan sa maong tawo nga suway nga nakig-negosasyon ngadto kaniya apan gitug-an niini nga gitanyagan siya niini nga andam mohatag og P50 mil ang pamilya ni Dra. Fe Villegas.

Si Dra. Fe nga maoy nanag-iya ug tagdumala sa Villegas Medical Clinic sa lungsod sa Barili, Cebu gipasakan og kasong administratiba sa pamilyang Maribao sa Professional Regulation Commission (PRC) human nila itumbok ang pagpabaya nga nahimo sa doktor nga maoy nakaingon sa kamatayon sa bata.

Matud ni Letecia dili gyud sila mosugot nga dunay negosasyon nga matigayon tungod kay itugyan na lang nila sa korte ang pagpangita og hustisya sa kamatayon sa bata. “Bisan pa og magkahulogan sa akong kamatayon andam ko, kay gitulisok ko sa akong tanlag kun nganong misalig ko niya,” dugang asoy ni Leticia.

Gitubag usab nila ang mga giluwatang pamahayag sa bana ni Dra. Fe nga si Claro Villegas nga napatik sa mga lokal nga pamantalaan nga dili tinuod ug hinimohimo lang  aron tabunan ang mga kapalpakan nga nahimo niini.

Gidugang ni Letecia nga pagkakaron giandam na usab sa ilang abogado nga si Atty. Czarem Estella ang dugang kasong kriminal ug damages nga ilang ipasaka sa korte batok sa doktora.