Babayeng way sapot naglutaw

Babayeng wala nay sapot  napalgang patay nga naglutawlutaw sa kadagatan habig sa  Pusok, duol sa usa ka sikat nga restaurant kagahapon sa kaadlawon.

Matud pa ni PO3 Manolito Abellanosa sa Homicide Section    sa LapuLapu Police Station nasayran nga mitawag ngadto sa ilang buhatan ang mga waiters ug waitress sa Antons Restaurant nga nahimutang sa daplin sa dagat sa maong dapit ug mipahibalo nga dunay patay’ng lawas sa usa ka babaye ilawom sa ilang restaurant hinungdan sa pagresponde sa kapolisan sa maong dapit.

Atol sa paghiling sa lawas sa maong babaye, matud pa ni PO3 Abellanosa nga walay lain silang ikahulagway sa biktima gumikan kay wala na kiniy sapot ug underwear lamang ang nahibilin  niini ug anaa na kini sa pagkadugta diin gibanabana nga tulo  o duha pa ka adlaw kini nga namatay.

Ang biktima gibanabana nga anaa sa pangidaron nga 20 pataas ug dili molapas sa 30 anyos, puti ang pamanit, taas ug itom ang buhok hangtod sa abaga. Gidala kini sa Rolling Hills Funeral Homes alang sa pag-ila sa mga posibleng paryente sa biktima.

Matud pa ni PO3 Abellanosa nga ila pa kompirmahon kun kini aduna bay kalambigitan sa taho sa milabay’ng adlaw nga dunay milayat sa taytayan sa Mactan Mandaue Bridge ug dili pa sila makaseguro kun aduna bay foul play o biktima sa pagpanglugos sa wala pa kini ilabay sa dagat gumikan kay duol na nga madugta ang kalawasan niini.