Akrho moabag pagsulbad sa drive-by shooting

Misaad nga mokooperar sa buhatan sa Cebu City Police Office ang usa sa mga lider sa Alpha Kappa Rho human kini imbitaha sa Homicide Section kabahin sa mga sunod-sunod nga pagpatay ug pagpamusil nga gidudahang may kalambigitan sa fratwar.

Si Insp, Mario Monilar, hepe sa Homicide Section mitug-an sa mga tigbalita nga giimbitar nila si Richard Buscaino aron pangayoan kini og ayuda aron mapadali ang pagsulbad sa mga kasong may labot ang ilang grupo.

Wala  hinuon moklaro si Monilar kun ang ilang imbitasyon may kalambigitan sa nahitabong drive-by-shootings nga diin usa sa mga nabiktima sakop sa Tau Gamma Phi.

Si CCPO city police director, Sr.Supt. Patrocinio Comendador kinsa gibisitahan usab ni Buscaino mitug-an sa mga tigbalitang iyang gipasabot nga dili dialogue ang iyang tuyo kundili ang kooperasyon niini isip lider sa maong pundok.

Wala iklaro sa kapolisan kung miyembro ba sa Akrho ang gidudahang suspek sa sunodsunod nga pagpamusil nga nakaingon sa kamatayon sa lima ug pagkaangol sa pito ka tawo sukad pa niadtong Septembre 21 hangtud niadtong Oktobre 5.

“I urged him to convince his members with warrants of arrest to surrender, mipasalig man siyang motabang kung mahibaw-an niya,” asoy pang Comendador.

Samtang dugang pa ni Comendador mitug-an usab si Buscaino kung asang mga dapita sa dakbayan ang angayang butangan og mga polis tungod sa hulga nga dunay mahitabong mga karambola sa mga fratman nunot niining semestral break.

Nagtuo si Comendador nga dunay mga aligutgot ang ubang mga fratman nga gusto nilang tapuson inig tapos na sa klase hinungdan nga nangayo siya og tabang kang Buscaino.

Samtang dugang pa niini, plano sa kapolisan nga hatagan og listahan si Buscaino sa mga pangalan sa mga sakop niining dunay mga pending warrants of arrest.

Si Buscaino sa pakighinabi sa mga tigbalita nangangkon nga wala siya kahibalo ug wala siya’y ideya kung si kinsa sa iyang mga sakop ang dunay mga warrants of arrest.

Apan si Comendador nagkanayon nga posibleng nakahibalo na si Buscaino kung si kinsang mga sakop niini ang gitumbok base sa dagan karon sa imbistigasyon sa kapolisan.