Mayor sa Sn Fernando wa matarog sa kaso

Wala mahulga si Mayor Lakambini Reluya sa lungsod sa San Fernando, Cebu sa kasong gipasaka sa iyang mga konsehal batok kaniya didto sa buhatan sa Ombudsman- Visayas may labot sa giingong ilegal nga pagamit sa P400 mil  nga pundo sa calamity fund sa gipahigayong kampanya pagsumpo sa dengue.

Gibutyag ni  Reluya sa dihang nahinabi sa Banat News nga gi-andam na karon niya ang iyang tubag sa maong reklamo sa higayon nga madawat na niya ang kopya sa maong reklamo ug ipatawag siya sa Ombudsman.

Gibutyag ni Reluya nga tinarong ang paggamit niya sa maong pundo niadtong  Septiyembre 3 sa  dihang gideklarar ubos sa dengue outbreak ang barangay Pitalo ug laing tulo pa ka barangay ang dengue hotspots nga mao ang barangay North Poblacion, South Poblacion ug San Isidro.

Matud ni Reluya gibasehan niya sa pagpagawas sa maong pundo mao ang rekomendasyon sa Department of Health (DOH) ug sa municipal health officer nga ubos sa dengue outbreak ang mga nahisgutang barangay.

Matud ni Reluya angay pa gani nga dayegon ang iyang gihimo nga pag-aksyon sa maong problema tungod kay alang niya kun wala pa niya kini himoa posibleng mas mograbe pa ang kaso sa dengue sa ilang lugar.

Subay sa rekord sa mayor dunay dili mominos 183 ka mga pasyente sa ilang lungsod nga gisuspetsahang nasakit og dengue  ang nakabenepisyo sa maong pundo pinaagi sa tag P2 mil  nga hinabang pinansyal alang sa ilang mga palitonong mga tambal nga gipaagi sa department of social services.

Apil na niini ang ambulansiya sa lungsod nga 24- oras nga naka-estambay sa munisipyo aron pag-atiman dayon sa mga pasyente.

Wala isalikway sa mayor ang posibilidad nga pamolitika ang motibo niining tanan ilabi na kay mayoriya sa mga sakop sa konseho iyang mga kaatbang sa milabay'ng piniliay.

Sila si Konsehal Vidala Loguiber, Alexander Alicaway, Miguel Canoy, Eutiquio Baricuatro, Felipe Parino, Remegio Alicaway, Juvy Procianos ug Neil Enriquez misang-at og reklamo batok sa ilang mayor sa Ombudsman tungod sa paggamit sa pundo niini nga walay pagtugot sa konseho.

Apan gipasabot ni Reluya nga giawhag niya ang konseho nga mopasar og resolusyon alang niini apan gilangaylangay siya og gipangayoan na hinuon og program of works hinungdan nga napugos siya pagpagawas sa maong pundo aron masalbar ang mga pasyente nga na-dengue ug makalusad dayon ang kampanya pagsumpo niini.