Magsuon gipatay

Gipamusil patay ang duha ka managsuong lalaki, usa kanila kawani sa Provincial Engineer’s Office, nga igo lang miuwang ang usa kanila sa away duol sa diskohan atol nga gisaulog  nga  tinuig nga kapistahan diha sa sitio Lib-og, barangay Lanao, lungsod sa Daanbantayan kagahapon sa kaadlawon.

Ang managsuong gipamusil giila nga sila si Francisco Rodrigo Sr., 54, minyo, ug residente sa sitio Lib-og ug ang manghod niining si Diosdado Jr. 38, minyo ug residente sa dalan Osmeña, Poblacion sa maong lungsod ug kawani sa Provincial Engineer’s Office nga nadestino sa motor pool isip drayber.

Ang gitumbok nga mipusil patay sa managsuon giila nga si Nading delos Santos, hingkod ug residente sa barangay Lanao.

Sa pakisusi sa kapolisan sa nahitaboan, ang anak sa namatay nga si Francisco Jr., 29, minyo, misaysay nga dunay panag-away nga mitumaw duol sa diskohan tali nilang Alvin Condino nga taga sitio Casia, sa samang barangay ug Raul Compuesto nga taga sitio Kurtihan barangay Agujo sakop sa maong lungsod.

Nakit-an ni Francisco Jr. ang iyang uyoan nga si Diosdado nga miduol sa panag-away nilang Condino ug Compuesto aron unta sa pag-uwang sa duha.

Apan kalit lang  mibunot ang suspek sa dala niining armas diha sa hawak ug gipusil si Diosdado makausa ka higayon.

Samtang ang maguwang nga si Francisco Sr. sa pagkakita daling midagan paingon sa nahitaboan kay buot untang tabangon ang iyang manghud nga nahagba na sa yuta apan siya na usab hinuon ang gisunod  og pusil sa suspek.

Si Diosdado naigo sa iyang tiyan samtang si Francisco Sr. naigo sa walang bahin sa lawas apan ang bala midulot sa bukog ug dali  silang gihatod sa Daanbantayan District Hospital apan ang duha ka biktima nakabsan nang daan sa kinabuhi pag-abot sa naasoy'ng tambalanan human gideklarar sa mga doktor nga dead on arrival (DOA).

Ang suspek gituohang kauban ni Condino human nagkuyog og sibat palayo sa nahitaboan.

Dugang nasayran sa kapolisan ni Rico Montalba, 30, residente sa Fuzo Heights, Poblacion sa maong lungsod kinsa kuyog sa mga biktima nagkanayon nga iya gyud nga nakita ang duha ka biktima nga gipamusil sa suspek.

Si Insp. Jovito Canlapan, hepe sa kapolisan sa lungsod daling mipahigayon og hot pursuit operation batok sa suspek didto sa pinuy-anan niini  apan wala na gyud nila igkita.

Matud pang PO1 Columbos Noynay sa dihang nahinabi sa Banat News nga padayon pa nilang  gipangita ang suspek samtang wala  pa usab  nila matino  kun  unsay motibo sa maong pagpamusil.