Not guilty – Otadoy

Ni-plead not guilty ang kontrobersyal nga polis nga kanhi sakop sa nabungkag na nga Vice Control Section sa Cebu City Police Office (CCPO) sa kasong robbery extortion nga gipasaka sa korte human akusahi sa pagpangilkil ngadto sa ilang dinakpan.

Si SPO1 Jaime Otadoy nihimakak sa tanang mga pasangil batok kaniya atol sa arraignment sa kasong robbery extortion kagahapon sa buntag didto sa sala ni regional Trial Court Judge Simeon Dumdum.

Sa giduso nga pinanumpa-ang pamahayag ni Otadoy gipadayag niini nga dunay kasuko ngadto kaniya ang complainant nga si Roel Lerio hinungdan nga gihapak siya sa maong mga pasangil.

Si Otadoy gisikop sa mga sakop sa National Bureau of Investigation (NBI-7) atol sa usa ka entrapment operation sa buhatan niini sa Vice Control Section sa CCPO niadtong nangaging mga bulan human giingong nangilkil og usa ka milyon ka pesos ngadto kang Lerio bugti sa dili pagpasaka niini og kaso sa korte may kalambigitan sa gidiling drugas.

Gumikan sa maong panghitabo gibungkag ang Vice Control Section ug kasamtangang gibalhin og destino sa Security Service Group sa CCPO sila si Otadoy ug duha ka kaubang polis niini.