Kabanay sa gikihang doktor mitiyabaw

Nitiyabaw ang pamilya ni Dra. Fe Villegas, ang tagdumala sa Villegas Medical Clinic nga nagbasi sa lungsod sa Barili, Cebu sa kasong administratiba nga gisang-at sa inahan sa walo ka bulan nga bata nga namatay sa dengue didto sa Professional Regulatory Commissions (PRC).

Gibutyag sa kanhi hepe sa Barili District Hospital Dr. Claro Villegas bana ni Dra. Fe nga unprofessional ang lakang nga gihimo ni Mary Grace Maribao, inahan sa namatay nga bata nga si Mathew pagdiretso og sang-at og kaso didto sa PRC batok sa iyang asawa.

Gipasabot ni Dr. Claro nga prayoridad nilang mga doktor ang pagsalbar sa kinabuhi sa tawo apan dili sab kalikayan nga dunay mga higayun nga dili na nila madala og salbar ang kinabuhi sa pasyente.

Nagsuspetsa si Dr. Claro nga dunay nagpaluyo nga pamolitika ning maong lakang ilabina kay ang iyang asawa nga doktora nagtinguha kining magpapili pagka kapitan sa lungsod sa Barili ning umaabot barangay ug SK election.

Matod ni Dr. Claro nga angay lang unta nga sabut-sabuton nila tali sa mga hingtungdan ang maong panghitabo ug dili na padak-on tungod kay karaan nilang mga pasyente ang maong pamilya gikan pa sa apohan niini.

Gihulagway sab niya nga sayop ang record sa Vicente Sotto Memorial Medical Center (VSMMC) tungod kay petsa 26 sa Septiyembre ug dili petsa 27 gi-refer nila ang pasyente diin mao ang adlaw nga namatay ang bata.

Hinoon gipadayag ni Dr. Claro nga giandam na karun ang tubag sa iyang asawa nga ilang iduso sa PRC may labot sa kasong administratiba nga gipasaka sa pamilyang Maribao batok kanila.