Way tikas bisag daghang flying voters

Gipaniguro ni Cebu City North District Election Officer Attorney Marchel Sarno nga walay mahitabong tikas dinhi sa siyudad sa umaabot nga Barangay ug SK elections.

Kini taliwa sa nigawas nga report sa nasudnong pamantalaan nga dunay kapin sa tres milyones nga flying voters o double registrants ang wa pa mahatagi og sulusyon sa Comelec.

Apan matod ni Sarno nga makapila nila sublia ang paglimpyo sa ilang voters’ list, uban sa pagtandi niini sa uban nilang mga records.

Gawas niini niingon ang election officer nga ubay-ubay ang gipaabot nga magpapili sa umaabot nga eleksyon ug gipaabot usab nga daghan ang mobantay sa maong piniliay.

“Lisod kaayo nang mahitabo nga dunay tikas sa umaabot nga eleksyon kay sa barangay ra man god na ang iniphanay, mahibaw-an man dayon ang resulta,” sumala pa ni Sarno.

“Kung dunay daghang managan, mapulos na unya watcher nang anaa sulod sa matag presinto mao nga kuli kaayo nga dunay mahitabong tikas,” dugang pamahayag ni Sarno.

Sa pikas bahin gipahibawo na sa election officer ang gidili ug ang mga angayang buhaton sa mga kandidato atol unya sa pagsugod na sa kampanya karong Biyernes.

Partikular na niini ang campaign poster nga maoy usa sa mga election propaganda sa mga kandidato  nga 2 by 3 feet lang ang gidak-on   nga gitugot sa Comelec, ug kinahanglang dili molapas sa P3 ang gastuhon sa kandidato sa matag botante.

Ang mga campaign poster adto lang usab ipamutang sa mga campaign poster area diha sa barangay nga ilhon sa Comelec.

Gipahimangnoan usab sa election officer ang mga kandidato nga dili mogamit og political party atol unya sa ilang pagpangampanya.

Kini pipila lang sa mga pasidaan ni Sarno ngadto sa mga kandidato sa nagsingabot nga piniliay base usab sa Comelec resolution number 8320.

Sumala pa ni Sarno nga usa lang ka election offense igo na nga makapa-disqualify sa usa ka kandidato gawas sa ubang silot nga mahimong ikapahamtang usab niini.