Gibunalan og riple, gihulog sa bung-aw

Usa ka lalaki nga namasangil sa mag-agaw nga gikawat iyang manok gibunalbunalan og armas sa iyang ulo nga miresulta sa iyang pagkamatay dihadiha ug pagkahuman giguyod ug gitambog ngadto sa bung-aw nga may giladmon nga 50 metros.

Apan nahitabo kini niadto pang Domingo sa gabii pasado alas 9 diha sa bukirang barangay sa Osmad, gibanabana sa kapolisan nga  dul-an sa napulo ka kilometro gikan sa Poblacion, lungsod sa Argao.

Nabuak ang ulo ug milugwa ang utok nga nakatag sa yuta sa biktimang giila nga si Donato Amarillo, hingkod ug residente sa barangay Panadtaran sa maong lungsod human bunal-bunali sa armas nga  .22 homemade rifle sa manag-agaw’ng sila si Amado alyas Bugyo ug William Pantinople, pulos hingkod ug residente sa samang barangay.

Matud pang PO1 Von Tecson nga nahinabi sa Banat News kagahapon miingon nga nakadawat sila’g report kabahin sa maong krimen.

Base sa imbestigasyon ni SPO1 Zorobabel Oyangoren sa Argao Police Station nasayran sa wala pa mahitabo ang pagpatay ang biktima nag-inom og duha ka lapad nga  bino uban sa iyang ugangan nga  si Tomas Malinog diha sa sulod sa panimalay ni Allan Gegrimosa.

Sa tantong panag-inom  miabot ang duha ka suspek ug misulod sa balay  diin si Amado nakit-an nga nagsungkod nang daan sa iyang dala nga .22 homemade rifle.

Dihadiha gisukmatan ni William ang biktima kun nganong sila maoy gipasanginlan  niini nga maoy nagkawat sa mga manok apan mitubag ang biktima nga wala siya  mamasangil sa duha ka suspek.

Pagkataud-taod nananghid ang duha ka suspek nga mopauli na apan ang biktima mikuyog sa pagpamauli ug didto nahitabo ang pagpatay diin gitabangan sa duha ang biktima.

Matud pang PO1 Tecson nga nabali-bali ang armas nga gidala ni Amado dihang narekober sa crime scene ug dihay usa ka bala nga miungot sa chamber.

Dugang  imbestigasyon ni SPO1 Oyangoren, iyang gituohan nga gipusil sa usa sa duha ka suspek ang biktima apan wala lang makabuto ang armas hinungdan nga gibunal na lang diha sa ulo ngadto sa biktima.

Dugang nasayran, usa ka Anecita Carillo ang mipahibalo ni Gegrimosa nianang pagkabuntag na nga gipatay ang biktima.

Nagtuo usab ang kapolisan sa Argao gawas sa armas nga gibunal ngadto sa ulo sa biktima posibleng duna pay laing gahi nga butang ang gibunal  tungod kay nabuak ang ulo niini ug milugsot ang utok sa wala pa  ihulog  sa kimba.

Ang duha ka mga suspek padayon pang gipangita sa kapolisan sa Argao human manglayas sa ilang dapit apan bisan paman niini gipasaka na ang tukmang kaso batok kanila.