Liddawa pakyas sa court hearing

Wala moatubang ang kontrobersyal nga si Sr. Insp. Jose Liddawa sa husay sa kasong planting of evidence nga giatubang niini didto sa sala ni RTC Judge Macaundas Hadji Razul kagahapon sa buntag.

Nasuta nga usa ka Dario Lopez  mipasaka og kaso batok kang Liddawa, SPO2  Lorenzo Pitogo ug PO2 William Red niadtong Abril 7, 1999 dihang didto pa sila madestino sa Guadalupe Police Station 9 ning dakbayan sa Sugbu.

Si Lopez nga nagpailang molupyo sa barangay Sapangdaku ning dakbayan miduso og kaso sa korte batok kang Liddawa ug mga kaubanan tungod sa gihulagway niining pagbutangbutang kaniya og ebidensya nga shabu  nga kalapasan sa Akta Republika 6425 nga maoy balaod batok sa drugas niadtong higayona.

Apan wala mahinayon ang maong hearing kagahapon human napakyas pagtambong si Liddawa hinungdan nga nakahukom si Judge Hadji Razul pagsibog sa maong husay ngadto na sa  Nobiyembre 7.

Nasayran nga si Liddawa nahimo kining kontrobersyal   human nagmaneho kining hubog ug mibangga sa nag-parking nga sakyanan sa ABS-CBN ug miresulta sa pagsinukmagay tali sa news crew niini nga sila si Ramil Paican, Joel Noel ug sa drayber niini.

Gumikan sa maong panghitabo si Liddawa gitangtang pagka-hepe sa Subangdaku Police Station sa dakbayan sa Mandaue ug gipaubos sa 45 ka adlaw nga preventive suspension.