Wala mahulga si Kapitan Marry Ann delos Santos sa barangay Lahug bisan paman ning panaghiusa sa kampo ni Mayor Tomas Osmeña ug sa mga militanting pundok alang sa eleksiyon sa barangay karong 29 ning buwana.
Kini maoy gipadayag ni Kapitan delos Santos human si Arman Perez, secretary general sa Bayan Muna Central Visayas mipadayag nga paranoid na ang kapitan sa pagdagan ni Jaime Paglinawan isip konsehal sa maong barangay uban sa BOPK slate hinungdan nga nagpataka na lang ug pasangil nga nag-uban sila sa mayor aron lumpagon ang liderato niini sa barangay Lahug.
Matud pa ni delos Santos nga wala siya mahadlok ni bisan kinsa ang iyang ikaatbang sa eleksiyon diha sa barangay gumikan kay napamatud-an na niya sa pipila ka mga eleksyon diin ang lider mismo sa iyang mga kaatbang gipildi na niya sa eleksiyon diha sa ilang barangay.
Dugang pa niini nga kun dili lang maniobrahon sa kampo sa BOPK ang eleksiyon magpadayon siyang makalingkod isip kapitan kini tungod kay ang katawhan nakakita na sa iyang agi sa pagdumala sa Lahug.
Gani dili siya motuo sa rason ni Perez nga wala makig-alayon ang mga militanting pundok sa grupo sa mayor kini tungod kay ang pagpasakop ni Paglinawan sa BOPK sa mga kandidato niini diha sa ilang barangay dili gayud kini ikalilong.
Sa nasayran nga si delos Santos mipadayag niadto nga ang kampo ni Osmeña hagbay nang nangandam sa paglumpag kaniya karong eleksiyon sa Oktubre kini human iyang gilubong diha si Osmeña sa iyang miaging eleksiyon sa ilang barangay.