...BFAD-7 mosusi sa Madridejos

Mohimo og pakisusi ang buhatan sa Bureau of Food and Drugs (BFAD 7) sa gikatahong pagkalanag sa mga bata sa lungsod sa Madridejos sa gikaon nilang ube milk candy nga gikan sa China.

Kini ang gipadayag ni  Monina Coyoca sa BFAD- 7 nga gikahinabi sa Banat News kagahapon human usab ikataho ang 35 sa 37  ka mga bata nga nahilo sa gikaon nga candy.

Matud pa niya nga maoy una nilang himoon ang pagkuha og sample sa maong mga candy alang sa ilang laboratory test nga pagahimoon niini.

Gitataw niya nga pinaagi sa laboratory test nga ilang pagahimuon ilang masuta kun ang maong candy nga gikaon sa mga biktima mao ba gayod ang nakaingon sa gibating pagsukasuka.

Mipasabot usab siya nga dili pa usab masiguro sa ilang buhatan kun ang ube  candy sa Shiento City sa  Maotong Food Company sa Guandong,  China   nalakip ba usab sa gidili alang sa pagbaligya.

Dugang pa niya  nga wala pa usab nila matino kun ang maong matang sa candy mao ba ang nakahilo nga hingpit lamang nga masuta pinaagi sa resulta sa laboratory test sa mga sample niini.

Si Coyoca miingon nga ang ilang buhatan ug ang Department of Health (DOH)  higpit nga nagdili sa pagkaon sa white rabbit sanglit nasuta man sa pagtuon nga gisagolan kini og formalin.