Mipasida-an ang kadagkuan sa Department of Labor and Employment (DOLE-7) ngadto sa mga nanag-iya og tagdumala sa pribadong kompaniya dinhi sa Central Visayas nga mamahimo kining mapasakaan og kaso sa higayon nga magdumili sa pagpatuman sa gi-aprobahang dugang umento sa suholan alang sa mga mamumuo dinhi sa rehiyon.
Gibutyag sa Assistant Regional director sa Dole-7 Ondo Carsuaga dihang nahinabi sa Bantay Radyo nga duna silay mga staff nga tahasan aron maoy mosusi niadtong mga kompaniya nga magdumili pagpatuman sa bag-ong wage order.
Iya usab gidasig ang mga mamumuo sa pagsumbong sa ilang buhatan kun dili mopatuman sa dugang umento sa suholan ang ilang mga amo.
Nasayran nga gi-aprobahan sa Regional Tripartite Wages and Productivity Board (RTWPB) ang pagpatuman og dugang P9 nga usbaw sa suholan sa mga mamumuo dinhi sa Metro Cebu ug tag P5 nga umento sa suholan alang sa mga mamumuo sa kalungsoran ug silingang probinsya dinhi sa rehiyon.
Hinuon gitakda pang ipublikar sa mga lokal nga pamantalaan ang bag-ong minimum wage order ug human sa 15 ka adlaw gikan sa publication mo-epekto dayon ang pagpatuman niini.
Kun mapatuman na unya ang bag-ong minimum wage order, ang P241 nga minimum nga suholan sa mga mamumuo dinhi sa Sugbu mahimo na unya nga P250.
Sayo niini, ang management sector miduso sa wage board nga unya na sa Enero sunod tuig ipatuman ang bag-ong minimum wage order apan gisupak kini sa labor sector tungod kay kalapasan kini sa Labor Code hinungdan nga nasabutan gyud sa milabay’ng tigum niini ang pagpatuman niini karong bulana.