Kasong acts of lasciviousness vs Fr. Ben gibasura

Gibasura sa piskaliya ang upat ka kasong acts of lasciviousness nga gipasaka batok kang Fr. Benidecto “Ben” Ejares, ang pari nga gireklamong mimolestiya sa mga tinun-an sa Abellana National School atol sa gipahigayon niining pagpakumpisal atol sa Life in the Spirit  Seminar sa maong tunghaan sa  milabay'ng tuig.

Sa gipakanaog nga resolusyon ni Cebu City Prosecutor Nicolas Sellon wala kini  nakitang lig-ong basihanan aron iduso sa korte ang upat ka kaso nga acts of lasciviousness may kalambigitan sa paglapas sa Akta Republika 7610 ug Akta Republika 7877 batok sa pari.

Kini human gihulagway nga usa ka relihiyosong kalihukan ang gipahigayon nga Life in the Spirit Seminar nga dili angay'ng hatagan og malisya sa publiko.

Nasayran nga subay sa reklamo nga giluwatan sa pipila ka mga tinun-an nanghikaphikap ang maong pari sa mga pribadong bahin sa lawas sa mga tinun-an dihang nagpahigayon kini og pagpakumpisal.

Apan alang sa piskaliya dili lig-on ang mga ebidensya nga gipresentar batok sa pari aron maoy basehan sa pagpasaka ning maong kaso ngadto sa korte.

Samtang lakip usab sa gibasura sa piskaliya ang rekomendasyon ni fiscal Alexander Acosta nga himuon na lang kasong unjust vexation ang ipasaka sa maong pari tungod kay matud sa piskaliya  mihupas na ang tagal alang sa pagpasaka ning maong kaso ilabi na kay  miabot pa og lima ka bulan una napasaka ang kaso batok kang Fr. Ben.