Paican gibug-atan sa silot sa ABS-CBN

Bug-at ra alang sa gitaktak nga   reporter sa ABS-CBN nga si Ramil Paican ang gipakanaog nga silot sa ilang kompaniya nga nagtaktak kaniya sa trabaho may labot sa nahitabong  vehicular  accident tali nila ni Sr. Insp. Jose Liddawa nga  miresulta sa kagubot.

Si Paican nga  nahinabi  sa Bantay Radyo mitug-an nga sakit kaayo ang maong gipakanaog nga desisyon sa management ilabi na kay mao kini  gisaligan sa iyang pamilya ug gani duna pa siyay dakong utang.

Matud ni Paican nga karon pa siya nakaamgo sa pait nga sitwasyon sa usa ka sakop sa media tungod kay gikinahanglan gyud nga kanunay nga mintinahon niini ang integridad   bisan unsay mahitabo.

Gitumbok niya ang iyang sayop nga nahimo nga mao ang pagbawos og sukmag kang Liddawa nga wala niya itug-an sa unang pagbalita niini human sa hitabo nga maoy hinungdan sa iyang pagkataktak sa trabaho.

Matud ni Paican nga sukad sa 15 ka tuig niya nga pagserbisyo sa ABS-CBN karon pa siya nakahimo og sayop nga maoy sentro sa gibantayan ug wala lang hatagi og merito ang iyang mga maayong pagserbisyo sulod sa dugay nang mga katuigan.

Si Paican uban sa cameraman nga si Joel Noel ug drayber nga si Samuel Trangia gitaktak sa management human masuta nga wala niini itug-an ang kinatibuk-ang detalye sa  komprontasi nila ni Liddawa.

Samtang ang presidente sa Kapisanan ng mga Brodkaster ng Pilipinas Cebu City Chapter Edward Abad mihangop sa desisyon sa management sa ABS-CBN.

Si Abad nagkanayon nga iyang girespeto ang desisyon sa management sa ABS-CBN kini tungod kay aduna man usay basehan ang pagtangtang kang Paican, Noel ug Trangia.