Vigilante killing ihunong –– Razon

Nunot niining nagkadaghan nang biktima sa gituohang vigilante-style killings dinhi sa dakbayan sa Sugbu si PNP director general Avelino Razon nanawagan sa kapolisan sa paghimo sa tanang pamaagi aron mahunong na kining maong mga krimen.

Si Razon sa pakighinabi sa mga tigbalita kagahapon nagkanayon nga dunay tukmang proseso sa pagsilot sa mga kriminal ug dili ang vigilante-style killings.

There should be an end to vigilante killings because that is a shortcut to our legal procedures, people cannot take the law in their hands. We have criminal justice system that is supposed to punish  wrongdoers and violators of the law, vigilantism is something that we should not allow in our community,” asoy pang Razon.

Sa pagkakaron, duna nay natalang 181 ka mga biktima sa gituuhang vigilante-style killings dinhi sa dakbayan nga nagsugod pa niadtong Disyembre 22, 2004.

Sagad sa mga biktima dunay mga criminal records ilabi na sa mga kasong robbery, theft ug snatchings, apan pipila sa mga napatay usab ang gituuhang binuhatan ra sa mga tawong mikopya sa estilo sa mga gituuhang vigilantes.

Ang maong mga panghitabo gikundenar sa simbahan nga dayag kaayong namahayag batok niini, samtang dunay mga sektor sa katilingban usab ang kusganong misupak apan kutob lang sa pagpadayag ang nahitabo sanglit walay bisan usa ka gituohang vigilante ang nadakpan ug nataral sa bilanggoan.

Agi’g tubag sa mga panawagan ang Cebu City Police Office mipatuman na og dugang mga random checkpoints ug midugang og police visibility sa kadalanan.

Sukad nga magsugod ang preparasyon sa Asean Summit niadtong tunga-tungang bahin sa tuig 2006, mimenus ang pagpamatay og mga ex-convict, gituuhang kini tungod sa kadaghan sa mga polis nga gi-deploy diha sa kadalanan alang sa maong international summit.

Si Razon sa iyang bahin mimando nga dugangan pa ang kasamtangang presensya sa kapolisan diha sa kadalanan ug higpit nga ipatuman ang mga balaod.

Samtang mibahad kini nga gukdon ug sikupon ang mga tawong iligal nga naghupot og mga dili lisensyadong mga armas.

Niadtong milabay'ng semana, ang ika-181 nga biktima sa gidudahang mga vigilante gitumba diha sa may ganghaan sa kilid sa Palace of Justice sa Capitol Site, ang biktima usa ka parolado sa kasong robbery ug usa palang ka buwan dihang gibuhian gikan sa Guadalupe police station.

Si Insp. Mario Monilar, hepe sa Homicide Section mitug-an nga base sa estilo sa pagpatay vigilante ang mihimo niini.