Cameraman sa ABS-CBN nangayo’g pasaylo, gitaktak

Tulo ka mga sakop sa ABS-CBN Central Visayas ang gi-terminate na sa ilang serbisyo sugod niadtong Lunes sa hapon human sila giingong nakalapas sa Code of Conduct sa maong kumpanya.

Sa balita kagahapon sa TV-Patrol Sentral Visayas gipahibalo sa management sa maong media outfit nga gipang-terminate na sa ilang trabaho ang reporter nga si Ramil Paican, cameraman nga si Joel Noel ug ang drayber sa crew cab nga si Samuel Tranghiya human sila giingong nakitang sad-an sa pagtago sa tinuuray nga nahitabo niadtong Septembre 18.

Ang tulo mipasangil nga sila gipangkulata sa hepe sa Subangdaku police station nga si Sr. Insp. Jose Liddawa,Jr. kinsa niadtong tungura hubog kaayo nga nanukmag nila human sila banggai niini diha sa Mandaue City.

Apan ang abogado ni Liddawa nga si Atty.Noel Archival kusganong mihimakak nga  nangulata ang opisyal kundili kini maoy nakulatahan. Ang maong hitabo gipakita sa footage sa TV Patrol.

Nasuta nga dili kini mao ang kinatibuk-ang footage sa nahitabo ug giisip kini nga dishonesty sa buhatan sa ABS-CBN.

Si Noel sa balita sa Balitang Bisdak kagahapon nangayo og pasaylo sa iyang pamilya ug kang Liddawa sa nahitabo ug miangkong nawad-an siya og kontrol sa iyang kaugalingon hinungdan nga nakasukol kini sa maong polis.

Sa susamang balita gikatahong gidawat sa abogado ni Liddawa ang pagpangayo og pasaylo ni Noel, samtang wala usab basola ni Noel si Paican sa video footage sanglit wala nila sabuti nga mao ra kadto ang ipagawas nga footage.

Ang desisyon sa pag-terminate kanila naggikan nila ni Tata Singco ug Danny de Guzman ang Human Resource Development sa ABS-CBN sa Manila.