Comendador permanente nang hepe sa dakbayan

Opisyal na nga maoy permanenteng direktor sa Cebu City Police Office si Sr.Supt. Patrocinio Comendador sugod pa niadtong  Hulyo 5 apan ang order niadto lang Hulyo 16 niya gikatahong nadawat.

Ang maong order gikatahong pinirmahan ni outgoing Police Regional Office-7 director Silverio Alarcio,Jr. human makitang angayan na kining permanenteng himuong direktor sa CCPO.

Nunot niini, si Comendador namahayag nga mas subsob niyang ipatuman ang mga programang nahuna-hunaan alang sa epektibong kampanya batok sa kriminalidad sa dakbayan.

Si Comendador nagkanayon usa na niini ang pag-centralized sa mga operations, mga beat patrols diin ang iyang buhatan na maoy mogunit aron mas dunay superbisyon kumparar nga diha sa mga police stations sila i-attach.

Nagplano usab ang opisyal nga pahingusgan pa ang mga checkpoints sa sulod sa dakbayan gumikan sa pagsaka na usab sa mga kaso sa pagpanulis ug pagpanglabni ilabi na sa downtown area.

Siya usab ang mipatuman sa pro-active stance sa CCPO batok sa krimen pinaagi sa pagmando sa iyang mga sakop nga dili magpunay og mika diha sa ilang mga police stations ug special units office ug kinahanglang didto sila sa kadalanan magpatrolya.

Si Comendador maoy mihulip kang Supt. Melvin Gayotin niadtong Enero 1 isip acting-director sa CCPO.

Atol sa paglingkod ni Comendador ubay-ubay sa mga high-profile cases ang ilang nasulbad lakip na niini ang pagsulbad sa pagpatay kang Sta. Fe mayoralty candidate Rogelio Illustrisimo,Sr. niadtong Mayo.

Ang pagkaaresto sa pipila sa mga sakop sa Garcia Robbery Group ug pagpasaka og mga kaso batok kanila sa mga pagpanulis nga ilang gihimo dinhi.