Wanted sa Quezon City nadakpan dinhi sa CIDG

Usa ka 18-anyos nga batan-ong dugay nang gipangita sa balaod sa Quezon City tungod sa kasong murder ang nadakpan sa mga sakop sa Criminal Investigation and Detection Group-7 kagahapon.

Ang gidakop giilang si Gilbert Cortez, 18, taga Holy Spirit sa Quezon City kinsa nag-atubang og kasong murder human kini makapatay atol sa usa ka rambol diha sa ilang lugar niadtong Nobiyembre 24,2006.

Ang mga sakop sa CIDG-7 pinanguluhan ni PO2 Angelito Yaon nakadawat og impormasyon kabahin kang Cortez kinsa giingong diha magtago sa iyang mga kabanay sa Labangon hinungdan nga ila kining giadto sa maong dapit.

Apan pag-abot sa maong dapit dunay mitug-an kanilang tua sa South Bus Terminal si Cortez hinungdan nga ila kining gisusi sa maong dapit, si Cortez wala na makaugpo sa mga polis dihang gisikop ug gipahibalong duna siya’y warrant of arrest gikan sa RTC Quezon City.

Si Cortez dihang gihinabi sa Banat News nagkanayon nga 17 anyos pa siya dihang nahitabo ang krimen ug nangangkong ‘self defense’ ang nahitabo tungod kay sila maoy gisulong diha sa ilang barangay sa grupo sa iyang napatay.

Matud pa niya nga nagkarambola ang mga tawo ug usa siya sa gidunggab sa maong tawo apan iya kining napangitaan og paaging maunay kini sa iyang kutsilyo diha sa dughan.

Sumala pa niya, diha nalang niya mahibaw-ing dunay daghang mga kabanay nga polis ang iyang napatay maong sa iyang kahadlok miikyas siya padulong dinhi sa Sugbu ug nitago sa Labangon diin mahimutang ang iyang mga paryente.

Si Cortez nagkanayon nga kaniadto pa human sa hitabo buot nang motahan apan gumikan kay wala pa sila’y kwartang magamit   wala na lang siya mohinayon.

Dugang pa niya nga nahadlok siya nga duna unyay dautang mahitabo kaniya didto sa Quezon City kun siya dad-on na didto.