Tulo patay sa aksidente

Tulo ka mga kinabuhi ang nangakalas ug upat ang nangaangol sa nahitabong aksidente sa kadalanan sa managlahing lugar diha sa lungsod sa Argao, Alegria ug Tabuelan sakop sa probinsya sa Sugbu niadtong Sabado ug kagahapon sa kaadlawon.

Unang insidente nahitabo sa national highway barangay Bogo lungsod sa Argao niadtong Sabado sa hapon.

Tulo ka managsuon luwan sa usa ka motorsiklo ang nalamba tungod sa kadangog sa karsada, usa kanila ang namatay.

Ang namatay giila nga si Bobby Mier 15, tinun-an sa high school ug ang duha niya ka igsuong nangaangol sila si Ruben 27, ug Limuel 21, ug mga residente sa maong dapit.

Segun sa report usa ka motorsiklo nga Honda Wave nga walay plaka ang gimaneho ni Limuel.

Ang managsuon gikan mitan-aw og kalingawan sa Poblacion nunot sa kapistahan sa maong lungsod.

Matud ni Limuel sa kapolisan nga tungod sa kadangog sa aspaltadong karsada mugna sa pagpunay’g uwan-uwan kalit lang nisigsag ang ilang dinaganan hangtud nga nawad-an siya og kontrol sa motorsiklo ug nalamba.

Si Bobby kinsa naglingkod sa luyong bahin sa motorsiklo maoy nagrabehan tungod sa pagkabunal sa karsada.

Ang managsuon daling gihatud sa Isidro Kintanar Memorial Hospital sa maong lungsod apan pila ka oras ang nakalabay nakabsan gyud sa kinabuhi si Bobby. Samtang ang iyang duha ka maguwang gibalhin sa Vicente Sotto Memorial Medical Center sa dakbayan sa Sugbu.

Ang ikaduhang aksidente sa kadalanan nahiatbo didto sa national road sitio San Roque lungsod sa Alegria.

Dead on Arrival sa Wertgen Memorial Hospital ang biktimang si Christopher Catana Cuevas 21, store helper ug residente sa barangay Guadalupe ug temporaryong nagpuyo sa sitio Galong, Legaspi sa maong lungsod.

Segun sa report nga nidangat sa Provincial Police ang biktima nagmaneho sa traysikol nagtangag sa plaka 7TC-E apan  pag-abot sa nahitaboan nakaligis kini og iro hinungdan sa iyang pagkatumba.

Ang biktima nakaangkon ug dakong kadaot sa ulo hinungdan nga maoy nakaingon sa hinanaling kamatayon niini.

Samtang didto sa sitio Campatoc Bungon Tabuelan usa ka Fuzo Van type nga nagtangag sa plaka GWR-114, iya sa Arley Cargo Forwarder ang nabangga sa pangpang nga miresulta sa pagkamatay sa driver ug pagkaangol sa duha ka truckboy.

Ang namatay giila nga si Marlon Lavares hingkod, nga taga Liloan Cebu samtang naangol mao sila si Jose Cardosa ug Sammy Loreno.

Base sa taho ang maong van nagdung sa sitio Campatoc apan sa paghidangat sa kurbadahon nga bahin kalit lang nawada-an og brake hinungdan nga nawad-an usab og kontrol si Lavares ug gibangga sa pangpang.

Daling gidala sa tambalanan ang tulo ka biktima apan si Lavares maoy nakabsan  nang daan sa kinabuhi.