Usa ka piniriso ang gihilantan ug paingon unta sa tambalanan ang nadasmagan og multicab samtang naglingkod sa nagpundong motorsiklo nga ilang gisakyan human ang kuyog nga polis duna pay gipalit sa merkado publiko.
Nahitabo kini niadtong Biyernes ala una sa hapon 30 ngadto sa 40 metros ang gilay-on gikan sa Police Station sa barangay Poblacion Pinamungajan.
Nakaangkon og samad sa nawong ug ubang parte sa kalawasan ang pinirisong giila nga si Bonifacio Resurecion, residente sa barangay Butong sa maong lungsod.
Samtang ang nakadasmag sa biktima mao si Melvin Quisido kinsa nagmaneho sa multicab nga gipanag-iya ni Erwin Managaytay nga taga Poblacion sa maong lungsod.
Matud pang SPO3 Basiliso Balicoco, ang Officer in Charge sa Pinamungajan nga nahinabi sa Banat News kagahapon mitug-an nga si Resurecion nabalhog sa detention cell usa na katuig kapin tungod sa kasong slight physical injury og gitakdang mogawas na sa prisohan karung ikaduhang semana sa Oktubre.
Sumala pa ni SPO3 Balicoco niadtong Huwebes gisugdan og hilanat si Resurecion ug pagka ugma adlawn’g Biyernes nihangyu kaniya nga magpadala sa tambalanan.
Iyang gipadala sa Pinamungajan District Hospital si Resurecion ni PO2 Peter Guanzo sakay sa motorsiklo nga gimaneho sa maong polis.
Apan matud niya nga si PO2 Guanzo mihapit pa sa merkado kay may gipalit ug nagpabilin lang sa motorsiklo si Resurecion hangtud nga nadasmagan ang biktima sa multicab.
Hinuon si Balicoco nabalik na og balhog sa detention cell kay nakagawas lang kini dayon sa tambalanan niadtong Biyernes sa hapon.
Matud ni SPO3 Balicoco pagkaigo sa motor nauban pagkatumba si Resurecion nga miresulta sa iyang pagkaangkon ug samad sa nawong ug bukton.
Midugang si Balicoco nga siya niadtong tungora diha sa siya sa duol sa nahitaboan kay nag-atiman sa trapik.
Si Cebu Provincial Police Office Director (CPPO) Sr. Supt Carmelo Valmoria nimandu kang Balicoco nga mohimog imbestigasyon kalabot sa maong hitabo ug isumiter personal kang Valmoria ang resulta sa imbestigasyon.
Usa niini ang kapakyas ni Balicoco pagdusog report sa Operation sa CPPO.
“Aw tubagon nako na kay ato manang trabaho labi pa kay mandu sa atong labaw ugmang adlawa (karun)mosayo ko kay alas 8 sa buntag man ko niya paadtuon sa Pronvicial headquarters”.