Aron mas makapili pa og tarong nga mga bag-ong polis, ang National Police Commission nagplanong ipatuman ang ‘Tawag’ susama sa mga managhigugmaay nga buot ng magpakasal ug ang simbahan maoy manawagan ug moanunsyo sa katilingban sa ilang pagpakasal.
Ang Napolcom buot nga mopatuman sa ‘Police Banns’ aron ipahibalo sa dapit diin magpuyo ang mga tawong buot mosulod pagkapolis sa iyang plano.
Susama sa “marriage banns” nga tawagon sulod sa tulo ka Domingo atol sa misa aron sa ingon ang mga tawong dunay interes sa kaminyuon sa duha sa bisan unsang rason makapadayag sa wala pa ang kasal.
Apan ang sa “Police Banns,” di lang kini ipatawag diha sa simbahan kundili ipahibalo kini pinaagi sa mga lokal nga sibyaanan, pamantalaan, mga posters sa munisipyo, merkado ug uban pang pampublikong dapit.
Ang mga pangalan sa mga tawong buot mosulod pagkapolis anha ibutang aron mahibaw-an sa ilang dapit ug aron usab kung dunay mga tawong supak niini gumikan sa ilang pagka-maldito, dunay di maayong rekord ug uban pa daling masayran sa Napolcom.
Sa matag tuig nga dunay recruitment, regular o attrition recruitment man, ipatuman sa Napolcom ang maong pahibalo nga mag-awhag sa katawhan sa pagpahibalo sa ilang buhatan kung duna may rason aron dili dawaton pagkapolis ang maong aplikante ug ingon man kung buot nila kining mamahimong polis sa ilang dapit.
Matud pa sa Napolcom, sa mga gagmay'ng kalungsoran, dali rang mailhan kinsay mga badlungon sa katilingban, ning paagiha dili na masipyat ang PNP sa pagpili sa ilang mga buot mamahimong miyembro.
Sumala pang Napolcom-7 director, Bernardo Calibo himuon nang requirements sa pagpangaplay sa pagka-polis ang ‘Police Banns.’