Kandidato sa Power Team 4 suportado

Si Bise Mayor Carlo Fortuna sa dakbayan sa Mandaue mipadayag nga  mosuporta kini  sa ilang mga kandidato sa pagka barangay kapitan ug konsehal sa karong election sa Oktobre 29 sunod bulan.

Si Fortuna miklaro nga ang ilang mga kaalyado sa milabay’ng election  nga  nakatabang kanila  makalaom sa ilang  suporta.

Si Fortuna miklaro nga ang Power Team 4 uban sa grupo ni Kongresista Nerisa Soon Ruiz maghiusa ug magpalig-on og maayo karong barangay election alang na sa ilang tinguha sa pagdaog pinaagi sa landslide batok sa ilang mga kaatbang diha sa barangay.

Dugang pa niini nga ubay-ubay na sa ilang mga kaalyado ang nangayo nila’g suporta alang sa maong katuyuan hinungdan nga dili usab sila makatalikod niini diin dako usab kaayo’g papel sa milabay’ng election diin lunod patay nga nisuporta kanila.

Gipasabot niini nga ang ilang mga  tagsatagsa ka mga miyembro ang  mopili  kinsay ilang suportahan kun gusto niini sama kaniya nga personal lang usab nga mosuporta niadtong tataw kaayo nga nidapig usab nila sa nakalabay’ng election.