Maisip nga gi-suwerte pa gyud ang usa ka polis dihang wala maigo human gipusil sa makadaghang higayon sa usa ka butalo nga drug pusher atol sa tabo niadtong Huwebes sa hapon diha sa barangay Mantalongon lungsod sa Barili.
Ang gipusil unta apan wala maigo giila nga si PO2 Michael Cortes nga nadistino sa Barili Police Station sa suspetsadong drug pusher nga si Randy Adlawan, 43, minyo nga taga barangay Malolos sa maong lungsod.
Niadtong tungora si PO2 Cortes kuyog sa usa ka Robert Aldamita, 38, minyo ug residente sa barangay Guadalupe siyudad sa Carcar.
Segun sa taho gitawag sa suspek si PO2 Cortes apan kalit lang kining mituyok dayong bunot sa dala niining wala matinong kalibre sa armas ug gipusil ang maong polis ug si Aldamita sa makadaghang higayon apan wala makaigo.
Dugang nasayran nga wala na madakpi pa ang suspek human misiot og dagan paingon sa daghang mga tawo niadtong higayona.
Segun sa report sa kapolisan ang maong suspek subject sa buy bust operation sa PNP personnel sa Barili.
Ang Banat News misuway’g kontak sa cellphone ni PO2 Cortes aron kakuhaan og dugang impormasyon sa maong hitabo apan out of coverage area kini.