Way doktor kay walay bakante

Ang Dakbayan sa Talisay wala pay mga doktor sa mga health center hangtod karon tungod kay wala pa mabuksi ang posisyon alang sa mga doktor nga ipangdestino diha sa mga health center.

Kahinumduman nga ang mga pasyente diha sa Barangay Poblacion, Lagtang ug Lawaan ang naproblema tungod kay walay doktor nga moatiman kanila.

Si Lino Alanzado, Talisay City Health Officer sa pakighinabi niini sa Banat News nagkanayon nga siya una ang moatiman sa mga pasyente samtang wala pay mga doktor diha sa mga health center.

Gibutyag ni Alanzado nga ang dakbayan dili pa makakuha og mga doktor kung dili pa mabuksan ang posisyon nga gamaon sa Sangguniang Panlungsod alang sa mga bag-ong doktor.

Si Doktor Virgelio Tangarorang ug Milagros Carloto pareho nang miretiro sa serbisyo samtang si Doktor Miraflor Bas-Bucao usa ka job order ang mi-leave tungod kay manganakay na kini.

Matud ni Alanzado nga ang nabakanteng posisyon ni Tangarorang ug Carloto ubos sa “salary grade 24” buot pasabot nga taas kini og posisyon ug wala kini sa charter sa dakbayan sa Talisay.

Ang SP kinahanglang maggama og resolusyon alang sa tulo ka posisyon sa medical health officer diin ubos ang salary grade o salary grade 20 lang kini.

Si Alanzado midungag nga gipaningkamotan sa SP nga niining tuiga mabuksan ang nahisgutang tulo ka posisyon aron sa sunod tuig aduna nay mga regular nga tulo ka medical health doctor.

Ang city health officer nanghinaot nga mahatagan siya og lugar diha sa city hall aron anha nalang niya atimanon ang mga pasyente ug dili na kini magkatibuwaag.