Child pornography dinhi sa dakbayan angay'ng tutukan

Ang higpit nga balaod batok sa pornograpiya sa mga kabataan angayang ipatuman sa kagamhanan ning dakbayan sa Sugbu, matud pa ni Lenny Ocasiones ang lider sa grupo nga Anti-Child Pornography Alliance  (ACPA).

Kini pinaagi sa higpit nga pagdili sa mga minor de edad pagsulod sa mga internet café ug ang mga malapason angayang pahamtangan og silot lakip na ang tag-iya ug tagdumala sa internet,matud pa niya.

Gibati'g pagmahay si Ocasiones sanglit kun may balaod mang gipatuman ang gobiyerno alang niini, nahisama ra sa balaod nga gipatuman sa mga senihan  ug mga imnanan nga nahimo lang nga“for your eyes only”.

Matud pa niya nga walay epekto kay way ngipon ang maong balaod kay sama ra sa usa ka butang nga walay kapuslanan.

Alang kang Ocasiones hilabihan na ka kompiyansa sa mga internetan ning siyudad kay halos ang mga batang babaye nga nagpangidaron og 7 anyos pasudlon sulod sa sekreto nilang lawak ug adto kuhaig hulagway ang hubo nilang lawas aron  pakuninitan sa mga gustong motan-aw niini didto sa gawas.

Miingon si Ocasiones nga nahimo kining sayon sa mga negosyanteng mapahimuslanon sanglit kun may balaod man, apan walay mga tinugyanan sa gobiyernong naniid kun gituman ba kining maong balaod.

Gumikan sa kahaguka sa balaod, sila na mismo si Ocasiones milusad ning maong kampanya pagsalbar nga dili kaayo malata sa kauwaw ang mga batan-ong babaye sa nasud ug  sila mismo ang mobantay aron kadtong mga malapason mataral ngadto sa hukmanan.

Alang kang Ocasiones gusto nilang hatagan og leksyon ang mga awtoridad kinsa walay pagtagad kun unsa na ka grabe ug kaseryoso ang krimeng nahitabo bahin sa child pornography dinhi.

Miingon si Ocasiones nga ilang gimonitor pag-ayo ang Cebu diin kasagaran sa mga mabiktima niining child pornography mao kadtong mga batan-on nga makasulod bisan unsang orasa sa internet  cafe ug hayloon lang og pipila ka kantidad nga salapi.

Midugang si Ocasiones nga maoy ilang misyon karon  ang  pagsanta ning maong binuang.

Midugang siya nga ang child pornography gitambayayungan sa pagpahimulos sa mga dautang negosyanteng mga Pilipino ug mga langyaw nga grupo.