Wala nay VK sa probinsiya?

“All out war against illegal gambling”

Kini maoy gimandu ni Cebu Provincial Police Office (CPPO) Director Sr. Supt Carmelo Valmoria ngadto sa tanan niyang sakop sa kalungsoran ug siyudad sa tibuok probinsya sa Sugbu.

Gibutyag ni Deputy Director for administration sa CPPO Supt. Erson Digal nga human sa ilang command conference niadtong Lunes sa buntag ilang nasabutan nga pahugtan ang kampanya sa tanang illegal gambling sa tibuok lalawigan sa Sugbu ug siya maoy gitugyanan ni Valmoria.

 Matud ni Digal nga nahibulong si Valmoria nganong kasagaran nga moabot sa ilang buhatan nga madakpan sa kapolisan sa kalungsoran ang sugal nga tong-its, ug hantak.

Duna sab silay madawat nga report nga mangronda ang kapolisan sa tigbakay ug hantak apan wala gihapoy madakpang mga sugarol sa rason nga nanagan ug hantakan ug antugon nalang ang ilang nakit-an.

“So we directed all the chief of police to radio messages to intensify all out war against illegal gambling,”nagkanayon si Digal.

Matud pang Digal nga kaniadto daghan  kaayong gipangdakop nga mga sugarol apan karon base sa ilang journal pulos nalang tong-its ug hantak ang ilang nadakpan ug wala nay nadakpang masiao ug videokarera.

Nunot niini nagduda si Valmoria nga wala na molihok ang mga hepe sa kalungsoran sa kampanya batok sa illegal nga sugal.

Ang tanang sugal ilabi na ang masiao ug video karera anaa gyuy nagpaluyong kuwarta ug posibling dunay mga polis sa kalungsoran nga nagdawatan og suburno sa mga financers aron maprotektahan ang ilang negosyo.

 Giangkon ni Digal nga dako nilang problema karon mao ang naghitak nga pagpadagan sa masiao ilabi na sa probinsya nga maoy kasagaran nga gikabuangan og pusta sa publiko.

Giklaro ni Digal dunay nagpadagan og mga video karera machines anha lang sa siyudad ug wala gyud sa mga kalungsoran kay sayon ra kaayong masakpan.