Bugno sa kaka ipahunong

Ang mga opisyal sa kabarangayan sa Lalawigan sa Sugbu giawhag sa mga sakop sa Hunta Probinsyal nga moabag sa mga magtutudlo sa pagpanakop ug badlong sa mga tinun-an nga magpabugno og kaka ug pagbaligya niini sa mga tunghaan.

Si Bokal Juan Bolo kinsa maoy chairman sa committee on education sa hunta probinsyal mipadayag nga ang mga kapitan pinaagi sa paggamit sa mga barangay tanod dako kaayo’g ikatabang sa pagsumpo niini nga mapugngan ang mga bata sa pagsugal sa pagpabugno og  kaka ug ang pagpamaligya niini sa mga  tunghaan.

Si Bolo nanghinaot nga mokooperar ang mga barangay opisyal kini tungod kay ang mga magtutudlo limitado na kaayo ang pagbantay sa mga tinun-an diin    wala nay kontrol sa paggawas sa mga tinun-an sa eskwelahan.

Matud pa niini usa ka matang sa sugal ang pagbugno sa kaka ug nagbutang kini sa panglawas sa mga bata sa peligro tungod kay   dunay mga kaka nga makamatay kun makapaak.

Lakip sa  iyang giawhag ang mga ginikanan nga badlungon  ang ilang mga anak sa pagduwa og mga kaka labi na kun moapil na kini sa pagpanugal sa tunghaan.

Sa nasayran nga matag tuig nalang ang mga opisyal sa lalawigan ingon man sa mga dakbayan ang mopahimangno labot sa sugal sa kaka apan inay paminawon ingon sa gibaliwala lang kini sa ubang mga opisyal.