Kawani sa Carcar CH gitigbas

Nahiwa ang nawong sa usa ka kawani sa kagamhanang lokal sa dakbayan sa Carcar dihang gitigbas sa iyang bayaw sa miaging gabii sa Monte Pasi, barangay Bolinawan, dakbayan sa Carcar.

Ang biktima sa pagpanigbas mao si Antonio Dayagdal, 32 ug ang suspetsado  mao si Benito Aguirre, 40, ug mag-uuma sa maong dapit. 

Si PO2 Renato Alondres nga gikahinabi sa Banat News miingon nga personal nga panagbangi ang motibo sa maong pagpanigbas.

Dugang pa niya ang biktima nga nagkadugo na ang nawong dali nga gidala sa Carcar District Hospital apan gibalhin   sa Vicente Sotto Memorial Medical Center sa dakbayan sa Sugbu.

Si PO2 Alondres miingon nga ang suspetsado kinsa diha sa ilang panimalay sa paghidangat sa mga polis ang dali usab nga gidakop ug gibalhog sa bilanggoan ug gipasakaan gilayon og kaso ngadto sa korte.