Kaso vs. kahera sa LTO-7 di pa mapasaka

Si Land Transportation Office (LTO-7) director Atty. Alex Leyson miklaro nga dili pa nila mapasakaan og kaso ang kahera nga si Marrisa Verinia kinsa gipasanginlang naka-dispalko og kapin sa dos milyones ka pesos.

Si Leyson nagkanayon nga hangtud  ang imbestigasyon sa Commision on Audit di pa  mahuman di sad makalihok ang ilang legal department  pag-preparar sa kasong dishonesty ug malversation of public funds batok kang Verinia.

Matud pa niini nga motunga man og  dili si Verinia ila gyud nga ipasaka ang maong kaso ug kun mahuman na kini’g imbestigar sa COA kun pila gyud ang kinatibuk-ang na-dispalko niini hayan karong Lunes ilang ma-file didto sa Ombudsman.

Iyang gidugang nga nagpaabot unta sila sa kooperasyon ni Verinia apan sa kalit lang wala na usab kini mopatim-aw og balik diha sa ilang buhatan hinungdan nga ang COA mihimo nalang sa ilang gimbuhaton sa paghipos sa uban pang mga ebidensya.

Sa nasayran nga si Verinia mipakita diha sa LTO-7 niadtong Lunes apan nagdumili kini sa pagkooperar sa legal department sa maong buhatan labot sa nadispalko niining kantidad nga suhulan unta sa mga kawani sa maong buhatan.

Gani ang LTO mihatag usab og igong panahon niini nga makapangitag kwarta human kini nipasalig nga taplan lang ang nadespalko human unya sa pagkahalin sa ilang yuta nga ibaligya.