Sakyanan nadasok sa dunay gihaya

Napulo ka mga tawo, unom niini mga tinun-an sa segundarya ang nangaangol human sa aksidente sa kadalanan sa managlahing lugar  diha sa lungsod sa Compostela ug Barili sakop sa probinsya sa Sugbu kagahapon sa buntag.

Unang nahitabo kagahapon pasado alas 6 sa buntag diha sa barangay Dakit, Barili diin usa ka ten wheeler cargo truck nga puno sa kopra ang misungag sa balay nga dunay patay nga gihaya nga miresulta sa pagkaangol sa tulo ka mga babaye.

Si SPO1 Zalde Orillo sa Barili Police nga nahinabi sa Banat News miila sa mga biktima nga sila si Rosalina Quisado,  57, ug anak niining si Janice, 21, ug Roselle Roda kinsa anak sa tag-iya sa balay diin gihaya ang iyang amahan.

Samtang ang nisungag nga ten wheeler plate no. GFK-768 gipanag-iya ni Wilfredo Cinco ug gimaneho ni Jolito Matos, 52, nga taga Ginatilan.

Matud pang SPO1 Orillo nga gikan sa Ginatilan ang ten wheeler truck ug paingon sa dakbayan sa Sugbu aron mag-deliver og kopra apan pag-abot sa nahisgutang lugar kalit lang nibuto ang walang ligid sa dulong hinungdan nga nisarasay kini ug didto napunta sa balay diin dunay gihaya nga minatay ug niadtong higayona ang mga biktima diha sa sulod.

“Maayo gani kay ang lungon didto ra sa kilid dapit totally damage gyud ang balay kay nihirig gyud,” dugang pang Orillo.

Ang mga biktima daling gihatud sa Barili District  Hospital apan sila si Janice ug Roselle gitakdang ibalhin sa Vicente Sotto.

Ang driver nga si Matos kasamtangan gitanggong sulod sa detention cell sa Barili Police Station.

Samtang sa laing bahin unom ka mga tinun-an sakay sa traysikol ang nalandig sa tambalanan human magkabangga sa Ceres bus kagahapon sa buntag diha sa National Hi-way brgy Estaca, Compostela.

Ang mga biktima giilang sila si Melfe Saquez, 17, Christine Andrade, 14, Johara Igoc, 13, Carol Andrade, 13, ug ang manag-agaw’ng Turno nga sila si Eric, 14 ug Edelyn, 14, pulos residente sa brgy. Tamiao sa maong lungsod.

Samtang naangol usab ang traysikol driver nga si Ronald Melendrez, 30, ug residente sa barangay Guiwanon.

Ang Ceres bus nagtangag sa plaka GWK-142 nga gimaneho ni Michael Plaza, 39, lumad nga taga Punod, Guindolman Bohol ug kasamtangan nagpuyo sa Cogon East Poblacion, Carmen.

Ang Ceres paingon sa dakbayan sa Sugbu samtang ang traysikol paingon maghatud sa eskuylahan sa mga biktima.

Matud pang PO1 Ryan Alarde nga parehong ni-overtake og laing sakyanan ang duruha hinungdan nga nag-abot sila sa tunga sa karsada.

Ang unom ka mga tinun-an ug driver sa traysikol daling gihatud   sa VSMMC samtang ang uban anaa sa pribadong tambalanan.

Ang driver sa Ceres gi-release lang usab dayon human magkasinabot ang mga hingtungdan.