Koreyanong Pastor sa usa ka simbahan nakabangga og motorsiklo diin nabali ang walang tiil sa biktima diha sa AC Cortes Ave. dakbayan sa Mandaue kagahapon sa kaadlawon.
Ang biktima mao si Vicente Soroño, Jr., 22, ug residente sa Sitio Tugas, Barangay Gun-ob dakbayan sa Lapu-Lapu ug usa kini ka mamaligya-ay og bulak.
Samtang ang nakabangga mao si Dae Kyun Seo, 56, minyo, usa ka Korean national ug Pastor sa Cebu Hanaro Church nga nahimutang sa dalan AC Cortes Ave duol sa nahitaboan.Base sa imbestigasyon ni PO3 Nestor Montecillo sa traffic division nasuta nga si Soroño gikan sa dakbayan sa Lapu-Lapu subay sa unang taytayan padulong mangompra og bulak.
Samtang si Dae padung na nga mo-parking sa Dispo Phils. Building gumikan kay aduna kini misa pagkaalas 5 sa buntag kagahapon.
Sa pagliko ni Dae wala kini makabantay nga kusog kaayo nga mipadagan si Soroño sa iyang motor hinungdan nga sila nagkabangga sa maong dapit ug pagkapasok sa motor niini sa ilalom sa Starex van nga gimaneho ni Lee.
Gumikan niini gidali og dala ni Dae si Soroño sa tambalanan ug nasuta nga aduna kini bali sa iyang walang tiil.
Hinuon matud pa ni Dae Kyun Seo andam siya nga mosagubang sa tanang galastuhan sa tambalanan diin hangtud karon anaa pa sa tambalanan si Soroño.