Nurse ug kauban gipamusil

Duha ka mga lalaki ang gipamusil sa duha ka wala mailhing tawo luwan sa motorsiklo samtang nag-inom ang biktima daplin sa kalsada kagahapon sa tungang gabii diha sa dalan Ascencion barangay Sambag Uno, dakbayan sa Sugbu.

Ang gipamusil giila ang mga biktima nga sila si Sherwin Esma, 22, ulitawo tinun-an sa Department of Manpower and Placement (DMDP) sa kursong cooking ug residente sa P. Del Rosario Extention, Kasambagan, dakbayan sa Sugbu ug Marton Aligata, 30, usa ka rehistradong nurse ug lumad nga taga San Carlos City ug temporaryong nagpuyo sa Midhouse Pelaez Extention.

Ang duha ka suspetsadong mamumuno nagsakay og kolor puwa nga motorsiklo nga medium built ug  bagaon og kilay.

Base sa asoy sa mga biktima sa homicide section nila ni SPO1 Jay Yballe, PO2 Jojo Ursaiz ug PO1 Lou Pagara kasamtangan nag-inom sila  uban sa ilang mga higala sa nahisgutang lugar tungod kay niadtong tungora ang usa sa ilang higala nagsaulog sa adlawn’g natawhan.

Apan kalit lang niabot ang motorsiklo sakay ang duha ka wala mailhing mamumuno ug sa walay igong hinungdan ang backrider nibunot sa dala niining armas ug namusil ngadto kanila human misulti og “Hello” dayong sibat palayo sa maong lugar.

Si Esma naigo sa wala niyang dalunggan samtang si Aligata nakaangkon og pinusilan sa iyang wala nga dughan ug sa kilid sa lawas.

Ang duha  anaa karun gipatambalan sa Chong Hua Hospital.

Dugang impormasyon nga nakuha sa homicide section sa wala pa mahitabo ang pagpamusil dunay nakakita sa mga suspek nga nagtuyok-tuyok sa ilang motorsiklo ug nagpangita sa ginganlan og Chong.

Usa ka slight deformed slug sa .38 revolver ang gi-turn-over sa ginganlan og George Escoto.

Hinuon padayon pang gihimoan og imbestigasyon.