Kahera sa LTO-7 mibalik na apan...

Pormal nang nipatim-aw ug nibalik na og duty sugod kagahapong adlawa ang cashier sa Land Transportation Office (LTO-7) nga si Marissa Veriña nga na-missing og tulo ka semana human makadispalko og P2 milyones   nga pundo sa maong ahensiya.

Gibutyag ni LTO-7 director Alex Leyson nga nibalik na og duty si Veriña  kagahapon human kini nipasalig ngadto kaniya nga bayran nalang ang unliquidated cash advances niini nga alang unta sa suholan ug allowance sa mga kawani sa maong buhatan niadtong tibuok bulan sa Agosto.

Apan wala una tuguti ni direktor Leyson nga makabalik sa iyang naandang gimbuhaton si Veriña  ug gibutang   kini sa clerical position samtang nagpadayon pa ang imbestigasyon batok kaniya.

Gawas niini duna na usay bag-ong gitudlong cashier si director Leyson nga maoy ni-take over sa nabiyaang mga gimbuhaton ni Veriña sama sa pag-asikaso sa ilang mga suholan dihang wala kini mopakita sa ilang buhatan sud sa pipila ka semana.

Gitug-an ni Leyson nga pagkakarun gipaabot nalang niya nga ma-reconcile ang figure sa gipahigayung pakisusi sa Commission on Audit (COA) ug sa special audit team nga iyang giumol aron mahibaw-an kun pila gyud ang kinatibuk-ang kantidad nga nadispalko niini ug aron maoy basihan sa pagpasaka og kasong kriminal ug administratiba didto sa Ombudsman Visayas.

Nagduda sab si Leyson nga posibleng dunay kunsabo si Veriña sa pagdispalko sa maong pundo gumikan kay lisod kining kuhaon gumikan kay nakadeposito man kini sa bangko.

Gibasol hinuon ni Leyson ang hepe sa Finance and Management Division nga si Corazon Bascon kun nganong wala niini mabantayi ang pag-withdraw ni Veriña sa maong kantidad nga unta iyaha man kining look  out.