'People Power' vs. Radaza – Kap

Nanawagan si Basak Barangay Kapitan Isabelito “Belong” Darnayla sa dakbayan sa Lapu-Lapu ang People Power alang sa pagpalagpot sa katungdanan kang Mayor Arturo Radaza.

Nunot usab kini sa pagsang-at og reklamo sa mga magpapatigayon ug uban pang hut-ong sa katilingban og graft complaint sa Ombudsman Visayas tungod sa gialigar nilang nahimo niining kahiwian sa katungdanan.

Kini misukwahi sa gilusad sa mga negosyante sa dakbayan nga ilang gitinguhang pagpalagpot kang Mayor Radaza nga ilang gitun-an alang sa pagpatawag sa recall election.

Ang pagsang-at sa reklamo sa Ombudsman Visayas gipasiugdahan sa Coral Point Foundation Inc., usa ka non-profit organization   nga nakapatuman na  og nagkadaiyang proyekto sa dakbayan.

Hinuon gihangop ni Lapu-Lapu City Administrator Teodolo Ybañez ang maong reklamo sa Ombudsman ug andam kini nilang tubagon sa proper forum.

Ang kauban nila Ybañez nga nalakip sa maong reklamo mao sila si Legal Officer Vincent Lim, Assistant Engineer Fernando Tagaan  ug uban pa.

Kini gisuportahan usab sa mga sakop sa Mactan Island of Chambers of Commerce and Industry (MICCI) sa negosyante nga gipangulohan sa ilang presidente nga si Efrain Pelaez.

Ang MICCI sa dakbayan maoy nakigpinirmahay og Memorandum of Agreement (MOA) uban kang Ombudsman Mercedeta Guttierrez isip watchdog batok sa pagpangurakot sa mga opisyal sa kagamhanan.

Sa ilang reklamo kang Radaza uban sa 19 ka mga opisyal sa dakbayan sa Ombudsman ilang gialigar nga nakahimo kini og kahiwian sa pagpalit og 470 ka unit sa mga computers nga mokabat sa kantidad nga P23.4 milyones nga gidughang gipaburot ang presyo.

Ang maong mga computer gikan pa sa Kein Enterprise nga maoy supplier ang usa ka Jennet Valencia nga maoy nakadaug sa bidding nga gipahigayon nga giapilan usab ATX ug Global Chips Technologies.

Matud pa ni Kapitan Darnayla nga daghan pang mga kahiwian nga nahimo ang administrasyon ni Radaza ug ang gisang-at nga reklamo sa mga negosyante ang tipik lamang niini.

Si Darnayla miingon nga taas kaayo ang proseso alang sa pagpa-recall sa usa ka pinili nga mga opisyal  ug ang katawhan nga naapektohan maoy nag-antus sa dili maayo  nilang mga binuhatan.

Dugang pa niya nga mga opisyal sama kang Radaza lisod kaayong madutlan sa recall election sanglit kun moapil kini sa piniliay hayan man nga modaug pinaagi sa mga pagmaniobra sa kuwarta.

“Dugay kaayo ang recall ug makapatuyang pa   og pangawkaw nga maoy gamiton alang sa pagsiguro sa kadaugan kay moapil man na sa eleksiyon,” nagkanayon si Kapitan Darnayla.

Si Vice Mayor Mario Amores nga gikahinabi sa Banat News miingon nga pinasubay lamang sa balaod ang pagpa-recall sa usa ka pinili nga opisyal nga pasanginlan nga nakahimo og kahiwian.

Dugang pa niya gisuportahan ang mayor sa mayoriyang mga kapitan sa dakbayan ug iyang nasiguro nga bisan ang people power nga gipanawagan ni Darnayla dili gihapon magsilbi.

Giklaro ni Amores nga gihimo nila ang ilang kaakohan sa konseho alang sa pagpatuman sa maong proyekto sanglit ilang nakita nga gitumong man kini sa kaayohan sa nagtungha nga kabataan.