Duha ka trabahante nakuryente

Nakabaton og grabeng paso sa ilang kalawasan ang duha ka construction worker dihang kalit lang nga nakuryentehan sa gitrabaho nilang APP Building sa National Highway, Pusok, dakbayan sa Lapu-Lapu sa miaging Sabado sa udto.

Si P03 Joseph Damasco miila sa duha ka biktima mao sila si Bernadin Placer, 33 nga taga Holyname Mabolo ug Roger Fernandez, 28 nga silingan niini sa maong dapit.

Matud pa ni P03 Damasco  nga ang duha nagtaud og willstrong aluminum apan nasaghid kini sa aluminum main line sa kuryente nga nakuhaan na sa panit.

Dugang pa niya nga human masaghid sa kuryente main line ang duha kalit nakuryentehan nga maoy nakaingon sa grabeng pagkapaso sa ilang kalawasan.

Ang duha ka mga kauban sa mga biktima nga sila si Ruel Canillas ug Apolonio Placer, Jr., ang leadman sa mga trabahante sa maong edipisyo maoy dali nga nakatabang kanila.

Dali nga gidala sa mga kaubang trabahante ang mga biktima sa  Cortes General Hospital sa dakbayan sa Mandaue kinsa padayon pa ang higpit nga pag-atiman niini.