Midaog sa Lotto gipatay

Usa ka lalaki nga nakadaog sa 4-digit nga lotto ang gipatay sa wala mailhing tawo ug napalgan nalang  kini nga dunay samad dinunggaban sa kalawasan niadtong Biyernes sa kaadlawon diha sa iyang gipuy-an sa sitio Mahayahay, barangay Gabi, Cordova.

Si Elmer Rosasina, 32, minyo, stay-in shellcraft worker sa Mirasol Shellcraft diha sa nahisgutang lugar ug lumad nga taga Daanbantayan Cebu napalgan nalang sa iyang kauban sa trabaho nga patay na kini sulod sa gihigdaan nga kuwarto sa gipapuy-an sa ilang amo.

Segun sa report nga nidangat sa provincial police ug base usab sa gihimong pakisusi sa kapolisan sa wala pa patya ang biktima nahibaw-an nga nakadaog sa lotto sa  4-digit sa raffle draw nianang Huwebes sa gabii.

Sa pagka alas nuybe sa gabii human makadaog ang biktima giimbitar siya  sa iyang mga higala nga makig-inom.

Apan dangtan pila ka oras sa ilang panag-inom uban sa iyang mga higala niuna kini sa pagpauli.

Nianang pagka alas 3 sa kaadlawon niadtong Biyernes ang biktima napalgan sa iyang kauban nga patay na.

Ang biktima nakaangkon og samad sa dughan ug tuong bukton nga maoy nakaingon sa iyang kamatayon.

Ang Banat News nisuway unta sa pagkontak sa ilang telepono sa Cordova Police Station apan walay manubag ug gisuwayan  usab sa pagkontak ang text hotline apan wala gihapoy mitubag sa 09188277652.