Extortion sa VCS nadunggan sa opisyal

Giingong pakignegosasyon sa mga polis sa Vice Control Section nga nangilkil og usa ka negosyante pinaagi sa telepono nadunggan mismo sa Chief of Staff sa Police Regional Office 7.

Si Sr.Supt. Agusto Marquez, hepe sa Regional Intelligence and Investigation Division mitug-an sa mga tigbalita nga usa sa tulo ka mga polis nga nalambigit sa isyu ang nadunggan mismo ni Sr.Supt. Arnulfo Perez samtang “nangilkil” og kwarta sa kabanay nga babaye ni Reuel Lerio nianang adlaw’ng Martes, usa ka adlaw una pa ang pagkasikop sa tulo.

Si Perez gikatahong mirekord sa maong panag-estorya human ang pamilya ni Lerio unang miduol sa buhatan ni Marquez aron pangayoan sila og tabang tungod sa pagsignit nila kang Lerio.

Apan gumikan kay ila rang mga sakop ang nalambigit ilang gidala sa National Bureau of Investigation ang kabanay ni Lerio ug nakig-coordinate nalang sila kang Chief Supt. Silverio Alarcio,Jr. ug Sr.Supt. Patrocinio Comendador.

Matud pang Marquez dugay na silang nakadawat og mga reklamo batok sa maong mga polis diin pipila niini ila lang giisip nga harassment complaints tungod sa kasuko nga sila gidakop ug ang uban kasamtangan pa nilang gikumpirmar.

Niadtong milabay’ng Miyerkules sa hapon gidakop sa mga sakop sa NBI diha mismo sa ilang buhatan sulod sa CCPO si SPO1 Jaime Otadoy human kini gikatahong midawat sa marked money nga gigamit sa NBI aron sila isulod sa laang.

Samtang ang laing duha ka polis nga sila si PO1 Raneil Capampangan ug PO2 Rey Albotra nga wala maapil sa dakop giapil og pasaka og kaso.