'Terorista' gikasuhan

Gidudahang sakop sa teroristang Abu Sayyaf nga na-intercept sa kapolisan diha sa pantalan sa dakbayan Pier 6 niadtong Miyerkules gipasakaan na og kaso. Apan dili tungod sa paglapas sa bag-ong balaod nga Human Security Act ang gigamit sa kapolisan tungod sa giingong kakulang sa mga rekisitos sama sa pag-demanda og pabor ngadto sa gobiyerno.

Ang suspek nga si Jino Musa alyas Noy Ampuan,19, lumad nga taga barangay Giawa, Kabuntalan, Maguindanao nga gidudahang sakop sa teroristang grupo apan wala pa matino kun Abu Sayyaf o ba kaha sa rebeldeng grupo sa  Moro Islamic Liberation Front.

Kasong paglapas lang sa Presidential Decree 1866 nga giamendahan sa RA 8294 kon Illegal Possession of Explosives ang gipasaka kagahapon sa buntag sa kapolisan diha sa piskalya.

Si Ampuan mahimong makapiyansa sa maong kaso apan wala pa matino kun nakagawas na ba kini.

“It’s the law and we can not avoid results for decisions like that. It would be dependent and incumbent upon the decision of the judge holding the case,” asoy pang Sr.Supt. Arnulfo Perez, ang Chief of Staff sa Police Regional Office 7.

Ang pagkasikop ni Ampuan gihilom dinhi sa dakbayan aron dili makamugna og kahadlok sa mga Sugbuanon ug aron usab madakpan ang iyang mga kaubanan nga nagpaabot kaniya didto sa Manila.

“The media, we asked their understanding.On things like this we would not  let the media know it at the initial moment because of the gravity of whatever their plans are, please consider and its good you have given us enough time to get all the initial results on the investigation and now we can tell the people that we have arrested this person. Paramount here is national security,” pagpasabot pang Perez.

Si Ampuan gikatahong misakay sa Superferry 5 gikan sa Pollok Port sa Parang, Dinaig Maguindanao diin ang barko moagi pa sa Zamboanga City, Cebu una pa sa Manila.

Matud pang Perez, base sa ticket ni Ampuan padulong kini sa Manila apan gumikan sa kadudahan kaayo niining lihok diha palang sa barko namatikdan kini sa mga Sea Marshals nga gilangkuban sa mga sakop sa Philippine Coast Guard hinungdan nga siya giaresto.

Pag-abot dinhi sa Sugbu, gisugat ang barko sa kapolisan, militar ug uban pang anti-terrorist units ug gisusi ang iyang dalang sako nga gisudlan og saging.

Ang mga sakop sa Special Weapons and Tactics pinanguluhan ni Chief Insp. Arnel Banzon maoy mihipos sa sakong bagahe ni Ampuan ug gidala kini ngadto sa South Reclamation Properties aron masigurong di kini makapanakit og tawo.

Matud pang Perez, nangangkon ang suspek nga wala siya kahibalo nga dunay eksplosibo sa maong sako sanglit gisugo lang siya niini. Sa report sa The Philippine Star, igsuong pamantalaan sa Banat News, usa ka sakop sa Abu Sayyaf nga giilang si Basit Usman ang misugo kaniya bugti sa P400 nga bayad.

“In the preliminary investigation he did not suspect it contain the things that was found out later on gidala lang sa iyaha sa ibang tao,” asoy pang Perez.

Gikumpirmar ni Perez nga dunay kasabot si Ampuan nga maoy mosugat kaniya diha sa pantalan sa Manila gani mihatag pa og cellphone number si Usman aron mao kini ang iyang tawgan inig abot didto.

Ang maong tawong kasabot ni Ampuan kasamtangan nang gipangita sa kapolisan sa kaulohan.

Sa pagsusi sa SWAT sa maong sako nakita ang usa ka itom nga goma sa interior sa ligid sa sakyanan nga gibulibod sa usa ka 90 millimeter Recoilless Rifle ug ang mas gamay nga usa ka M76 Rifle Grenade.

Ang 90mm RR kun “90-RR” usa ka matang sa anti-tank weapon ug ang M76 RG maoy isumpay sagad sa Armalite Rifle aron kini mas layo og abuton kumparar sa ordinaryong granada nga ilabay sa kamot.

Ang maong eksplosibo wala pabutha sa SWAT sukwahi sa nahaunang report sa ubang pamantalaan (dili ning pamantalaan) tungod kay gamiton kining ebidensya.

Nagduda si Perez nga i-convert ang maong mga eksplosibo aron mahimong IED kun improvised explosives device, nga maoy sagad gigamit sa MILF niadtong gubat batok sa gobiyerno ug mga rebelde isip IED ug landmines.

Dako ang pagtuo ni Perez nga dako ang kadaut nga mahimo sa maong mga eksplosibo kun wala pa masikop si Ampuan.

“We have pre-empted something worst that will happen and we congratulated our operatives for a job well done,” asoy pang Perez.

Ang kapolisan gibutang sa full alert sukad pa niadtong magsugod ang opensiba sa military batok sa mga sakop sa Abu Sayyaf nga mipunggot sa ulo sa 10 sa 14 ka mga sakop sa Marines.

Si PNP Director, Oscar Calderon mitug-an nga ang nahitabong pagpamomba sa Zamboanga City ning bag-uhay lang kabahin sa diversionary tactics sa ASG.

Gipasalig hinuon ni Chief Supt. Silverio Alarcio,Jr. nga luwas ang Central Visayas sa bisan unsang hulga sa mga terorista ug wala pa sad sila makadawat og impormasyong dunay grupong naglihok dinhi.