'Nangilkil' nga polis taktakon gyud

Gipasalig sa National Police Commission (NAPOLCOM) nga taktakon ug dili nila panalipdan ang tulo ka mga polis nga sakop sa nabungkag nga Vice Control Section sa Cebu City Police Office (CCPO) nga gidakop pinaagi sa usa ka entrapment operation sa National Bureau of Investigation (NBI) tungod sa pagpangilkil ngadto sa usa ka negosyanteng nagpaila nga Ruel Lerio.

Gipadayag sa Information Officer sa NAPOLCOM-7, Atty. Zandro Oriol nga pagkakarun paabuton una nila ang resolusyon sa Ombudsman Visayas sa kasong Robbery Extortion nga gipasaka batok nila ni SPO1 Jaime Otadoy, PO1 Raniel Capangpangan ug PO2 Rey Albotra.

Kini tungod kay matod ni Oriol ang resolusyon sa Ombudsman sa maong kaso maoy ilang basihan sa pagpahigayon unya og summary hearings alang na sa pormal nga imbestigasyon nga atubangon sa maong mga polis diha sa Napolcom.

Gibutyag ni Oriol nga medyo malangay pa og gamay una pa sila makasugod sa ilang imbistigasyon gawas lang kun gidiretso pa sa ilang buhatan ang pagsang-at sa kasong administratiba.

Hinuon matud ni Oriol nga pagkataktak sa serbisyo ang silot nga ipahamtang sa maong mga polis sa higayon nga masuta nga dunay probable cause ang maong aligasyon atol unya sa summary hearings nga himoon sa Napolcom.

Matud ni Oriol bug-at ang kasong grave misconduct nga atubangon sa maong tulo ka polis nga dunay silot nga pagkataktak sa serbisyo kun maprobar sa imbestigasyon nga lehitimo ang gipahigayong entrapment operation.

Si Otadoy nasikop sa entrapment operation niadtong niaging adlaw diha gyud sa buhatan sa VCS nga giingong nangilkil og P2 milyones ngadto kang Lerio nga nalambigit sa kasong gidiling drugas apan ang iyang duha ka kauban nga si PO1 Raniel Capangpangan ug PO2  Rey Albotra nakaeskapo niadtong higayuna.

Kagahapon sa hapon si Otadoy gipabuhian sa korte human kini mopiyansa og P20,000 alang sa temporaryong kagawasan sa kasong paglapas sa Artikulo 294 sa Revised Penal Code tungod sa pagkuha sa kwintas ug relo ni Lerio.

Samtang gitun-an pa sa Ombudsman ang kasong Robbery with extortion batok kanilang tulo.