Pagka-presidente sa VML ang gusto ni Rama

Desidido na kaayo nga magpapili sa pagka presidente sa Vice Mayors League sa tibuok nasud si Bise Mayor Mike Rama karong Pebrero sa sunod tuig atol sa ilang election.

Si Rama nagkanayon nga mopadayon siya sa iyang plano ug posibleng magpili siya'g pares nga gikan sa Luzon o kaha sa Mindanao kini tungod kay para kaniya dako kaayo kini'g mahatag usab nga pagpalambo sa ilang mga legislative function sama na unya sa pagbinayloay og ideya alang sa maayong pagpalabang og balaudnon ug ordinansa.

Sumala pa niini nga ang iyang mga kaubang mayor sa probinsya sa Sugbu nahibalo na niini hinungdan nga  hugot usab siyang nisuporta karon sa ilang election sa Cebu Provincial Vice Mayor's League nga mopahigayon usab og election karong adlawa.

Hinuon iyang giklaro nga dili siya magpapili karong adlaw kun dili adto na siya sa national level sa sunod tuig gumikan kay suporta lang usab ang iyang pagtambong diin nagpasakop siya sa mga Bise Mayor sa Probinsiya sa Sugbu gumikan kay gamay raman usab silang mga bise mayor sa mga highly urbanized dinhi sa nasud.

Dugang pa niini nga walay advantages nga makuha nga proyekto ang usa ka  bise  mayor nga mahimong presidente sa liga niini sa lukop nasud kini tungod kay dili kini sama sa Regional Development Council nga mopahigayon og proyekto, samtang ang panagbaylo lang  og mga maayong lakang ug ideya maoy makuha diha sa Liga.